لە نەورۆزی ئەمساڵدا ئەو موژدەیەتان پێ دەدەین كە ڕێگای نوێبوونەوەی خەباتی ڕۆژهەڵات ڕۆژ لە دوای ڕۆژ هەموارتر دەبێ
هاونیشتمانیانی تێکۆشەر!
خوشک و برایانی ئازیز!
با لە سەرەتای ساڵی نوێ و جێژنی نەورۆزدا سڵاو و پیرۆزبایی خۆمان بنێرین بۆ کۆمەڵانی خەڵکی کوردستان، بنەماڵەی شەهیدان، کەمئەندامانی ڕێگای خەبات، زیندانییە سیاسییەکان، کادر و پێشمەرگە و ئەندام و لایەنگرانی حیزبی دێموکراتی کوردستانی ئێران و هەموو چالاکوانانی سیاسی لە سەرانسەری ئێران بە تایبەت لاوە چاونەترس و وشیارەکانی کورد کە ساڵی ١٣٩٦یش وەک هەموو ساڵانی ڕابردوو لەژێر زەبر و سەرکووتی ڕێژیمی دژی ئازادییەکان، بوێرانە خەباتی خۆیان بۆ ڕزگاری و ئازادیی نیشتمان و گەلەکەیان درێژە دا و لە تێکۆشان ڕانەوەستان.
كوردستانییانی خۆڕاگر!
ئەمساڵیش لە كاتێكدا بەرەوپیری نەورۆز دەچین كە ساڵی ڕابردوو، وڵات و نەتەوەكەمان چەندین پێشهاتی جۆراوجۆری بە خۆیەوە بینیوە كە هەر یەك لەوان دەكرێ بە سەركەوتن و لاوازی هەژمار بكەین. دەسكەوتگەلێك كە پێشهاتەكانی خۆرهەڵات، باشوور و ڕۆژئاوای كوردستان بە خۆیانەوە بینیویانە و لاوازیگەلێك كە دیارترینیان لە باشوور و ڕۆژئاوا بەدی دەكرێن؛ بەڵام كاتێك لە سۆنگەی نەورۆزەوە سەیری هەموو ئەمانە دەكەین، لە ڕۆژهەڵات تەنیا ناسنامەیەكمان وەبیر دەخاتەوە، ئەویش ناسنامەی "ڕاسان"ە، ڕاسان به واتای به‌رده‌وام بوون لە خەبات بە مەبەستی گرێدانی خەباتی شار و شاخ.
پێدەچێ وڵات و نەتەوەی كورد بەرەوڕووی دەسكەوت و لاوازی زۆر بن، بەڵام فەلسەفەی وجودی نەورۆز پێمان دەڵێ كە بەردەوامی لە ڕاسان دەتوانێ ڕەمزی مانەوەی كورد بێ؛ نەورۆز فێری كردووین كە تەنیا بەرەوپیری نوێبوونەوەی سروشت ناڕۆین، بەڵكوو هەردەم ڕوومان لە ڕاسان و ڕابوونە بەرانبەر بە دژبەرانی کورد و گەڕان بەدوای بەئەنجام گەیاندنی دۆزێك كە دەیان ساڵە كوردستانییەکان خەباتی بۆ دەكەن. لە نەورۆزەوە فێر بووین كە لە نوێبوونەوە و تێکۆشان بەردەوام بین، چوونکە ڕاوەستان مانای نییە، هه‌ر وه‌ك چۆن سروشت له نوێبوونه‌وه ڕاناوه‌ستێ، كوردیش له تێكۆشان بۆ گه‌یشتن به ئامانجه‌كانی کۆڵ نادا. نەتەوەیەك كە ژێرخانی فكری و فەلسەفییەكەی ئەوە بێ كە قەبووڵی زوڵم نەكات، دەبێ بەردەوام بێ لە ڕابوون و خوڵقاندنی دونیایەك كە لەوێدا هەست بە ئارامی، رزگاری و ئازادی بكات.
ڕاسانی ڕۆژهەڵاتیش لە دڵ و قووڵایی عەقڵییەتێكی لەم شێوەیە سەرچاوەی گرتووە؛ لە دڵی عەقڵییەتێكەوە كە دەبێ خۆی نوێ بكاتەوە، فكری نوێ بخاتە مەیدانەوە و بۆ ئەم مەبەستە خۆی تەیاری هەموو كەرەستەیەك بكات كە دەتوانێ یارمەتیدەری بێ. ئێمە وەك حیزبی دیموكرات بە بنچینە وەرگرتنی ئەم تێگەیشتنە، لە چه‌ن ساڵی ڕابردووه‌وه خۆمان بۆ هێنانە ئارای گۆڕانكاری لە حیزبەكەمان تەرخان كرد بۆیە لە بەرەبەری نەورۆزی ئەمساڵدا دەتوانین ئەو موژدەیەتان پێ بدەین كە ڕێگای نوێبوونەوەی خەباتی ڕۆژهەڵات ڕۆژ لە دوای ڕۆژ هەموارتر دەبێ بە مەرجێک ئارام نەگرین، تاكوو بتوانین تا نەورۆزی داهاتوو دەسكەوتی زیاتر مسۆگەر بكەین.
ئێمە لە سەرەتای مانگی ڕەشەمەی ١٣٩٦ی هەتاویدا، کۆنگرەی شانزدەهەمی حیزبەکەمان کۆنگرەی "ڕاسانی رۆژهەڵات"مان بە سەرکەوتنەوە بەڕێوە برد، کۆنگرەیەک کە دەروازەکانی بە ڕووی نوێبوونەوەی حیزبەکەمان خستە سەرپشت، بۆ ئەوەی حیزبی دێموکرات بتوانێ، هاوهەنگاو لەگەڵ ئاڵوگۆڕەکانی کۆمەڵگا، خۆی بگونجێنێ و بەرە و گەشانەوە و نوێبوونەوە هەنگاو بنێ، به‌ڵام تا گه‌یشتن به ئامانجه‌كانمان ساڵ له دوای ساڵ هه‌وڵی زیاتری بۆ ده‌ده‌ین و ماندوو نابین.
لە ساڵی ڕابردوودا كوردستانییان لە باشور ڕابوونێكی گەورەیان بە خۆیانەوە بینی، ئەویش ئیرادەی ڕێفراندۆم بوو، تاكوو بەهارێك لە پاییزدا ساز بكەن؛ ئەم ڕاسانەی باشوور هەموو نەیارانی بەرانبەر بە كورد قیت كردەوە، تاكوو نەهێڵن كورد لەو بەشەدا ڕێگای سەركەوتنی خۆیان مسۆگەر بكەن، بەڵام نەتەوەیەك كە هەڵگری فەلسەفەی نەورۆز و ڕاسان بێ، ئەستەمە لەم ڕێگایە بكشێتەوە یان چۆك دابدات. چونكە لە ناسنامەی ئێمەدا یەك شت جێگیر بووە، ئەویش نەسرەوتنە تا سەركەوتن، هەر وەك چۆن ڕۆژهەڵاتییەكان لە ناو دڵی دوژمندا زەماوەندی ئاڵایان گێڕا، تاكوو پیشان بدەن كە "ئەی رەقیب هەر ماوە قەومی كورد زمان".
لە لایەكی ترەوە ساڵی ڕابردوو خۆرهەڵاتی كوردستان تووشی كارەساتێكی دڵتەزین هات. ئەویش بوومەلەرزەی كرماشان بوو، بەڵام كوردەکان ئەو كارەساتەیان كرد بە حەماسەیەك و كاروانی یارمەتی لە هەموو شار و گوندەكانی كوردستانەوە بەرەو كرماشان ڕیزیان بەست؛ وەك چۆن پێشمەرگە ڕیز دەبەستن بۆ جێگیربوونەوە لە باوشی نیشتمان، بۆ كارەساتی كرماشانیش "ئەبووبەکر مەعرووفی"یه‌كان بە ئیرادەی نیشتماپەروەرانەوە خەمی هاونیشتمانییە لێقەوماوەکانیان بە خەمی خۆیان زانی و قوربانیشیان لەم ڕێگەیە دا، تاكوو بڵێن هەرچەند خاوەن دەوڵەت و دەسەڵات نین، بەڵام یەكگرتوو و خاوەن ئیرادەین، ئیراده‌یه‌ک كه بۆته چقڵی چاوی كۆماری ئیسلامی و ده‌ست و پێوه‌ندییه‌كانی.
هەر لەم ساڵەدا بوو كە سپای بەغدا پەلاماری کەرکووکی دا لە هەرێمی کوردستان، تاكوو بە خەیاڵی خۆیان ئیرادەی كورد بشكێنن، بەڵام هەمدیسان ڕووبەرووی نەتەوەیەك بوونەوە كە فێرنەبوون بە ژێردەستی، بە تایبەت کە ساڵانێكە تامی ڕزگاری و ئازادی دەچێژن، بۆیە لە كاتێكدا كورد تەنیا بوو، بەڵام سەنگەری چۆڵ نەكرد بۆ ئەوانەی خولیای "فەتح الفتوحات"یان بوو.
هەر لە ساڵی ڕابردوودا بوو كە هاوپه‌یمانی جیهانی پاشەكشەی بە داعش كرد و زۆربەی ناوچەكانیان بە یارمەتی كورد لە داعش وەرگرتەوە، به‌شێوه‌یه‌ک كه ئه‌گه‌ر یارمه‌تی كورد نه‌با پێده‌چوو لاوازكردنی داعش زۆر ئه‌سته‌م بێ.، بەڵام هەر وەك چۆن لە سەرەتاوە لەو باوەڕەدا بووین، ئێستاش لەو باوەڕەداین كە داعشی ڕاستەقینە كۆماری ئیسلامیی ئێرانە.
كۆمارێك كە دایكی هەموو داعشەکان و تێرۆر و نەهامەتییەكانە لە ناوچەكەدا، بۆیە لەو بڕوایەداین تا كۆماری ئیسلامی مابێ، جیهان ناتوانێ داعش و داعشەکان بنبڕ بكات.
یەكێكی تر لەو كێشانەی كە لەم مانگانەی دواییدا بەرۆكی كوردی گرتەوە پەلامار بۆ سەر عەفرینه؛ پەلامارێک كە ئه‌زموونی كوردی له ڕۆژئاوا خستە مه‌ترسییه‌وه، بۆیە لێرەشدا ئێمە وەک حیزبی دێموكرات وەك هەمیشە لە سەنگەری كورد و كوردستانداین و هەر كارەساتێك بۆ نەتەوەكەمان بە كارەساتی خۆمان دەزانین، بە بێ جیاوازی پارچەكانی كوردستان. عەفرین زامدارە هەر وەک چۆن کەرکووکیان زامدار کرد، بەڵام ئەو برینانە ساڕێژ دەبنەوە، ئاخر کوردستان زام هەڵدەگرێ بەڵام نامرێ، عەفرین و کەرکووکیش هەڵدەستنەوە سەرپێ و هەمدیسان بۆ ئازادی و ڕزگاری خۆیان تێهەڵدەچنەوە.
دەمهەوێ لەم دەرفەتە کەڵک وەربگرم بۆ دەربڕینی سیاسەتی حیزبەکەمان لە هەمبەر بەرنامەکانی ڕێژیم دژی خەبات و بەربەرەکانێی ڕەوای خەڵک و حیزبی دێموکراتی کوردستانی ئێران. لەم ڕۆژەدا ئێمە ئاگادارین کە ڕێژیم ئەمساڵیش وەک ساڵانی پێشوو خەریکی ئامادەکارییە بۆ ئەوەی بە پیلانی تێرۆرکردن، پێکهێنانی گوشار لە سەر ڕێبەرایەتی حیزب لە باشوور، هەوڵدان بۆ پێکهێنانی دووبەرەکی لە نێو هێزەکانی کورددا و زۆر خەون و خەیاڵی دیکەش ئەگەر بۆی بکرێ، لە سەر ڕێگای گەشەکردنی حیزب و کار و تێکۆشانەکانی کۆسپ پێک بێنێ، به‌ڵام نه ڕه‌فتاره‌كانی كۆماری ئیسلامی بۆ ئێمه نوێن و نه پیلانەکانی هەنگاومان پێ شل دەکا؛ چونكه له ماوه‌ی ئه‌م چوار ده‌یه‌دا بۆ هه‌مووان ئاشكرا بووه كه كوردی ڕۆژهه‌ڵات و به‌تایبه‌ت حیزبی دێموكرات هێزێك نییه لە بەرانبەر پیلانەکانی ڕێژیم ترسی لێ بنیشێت یان پاشه‌كشە بكات، به‌پێچه‌وانەوە به‌م كارانه‌یان هانمان دەدەن كه زیاتر له جاران خۆمان بۆ خه‌باتێكی توندوتۆڵ ئاماده بكه‌ین؛ خه‌باتێك كه شه‌قام و کۆڵانی شاره‌كانی رۆژهه‌ڵات مه‌كۆ و مه‌ڵبه‌ندی سه‌ركییه‌تی. خاوه‌نی ئه‌م خه‌باته خه‌ڵكی ڕۆژهه‌ڵاته و ئیراده‌ی ئه‌وانه كه كۆماری ئیسلامی تۆقاندووه و وا ده‌كات په‌نا بۆ هەموو كرده‌وه‌یەکی نامرۆڤانه ببه‌ن بەڵام ئەم پیلانانە ئەگەر دادی کۆماری ئیسلامییان دابا، لە چڵ ساڵی ڕابردوودا دەیانتوانی دەنگی هاواری خەڵکەکە کپ کەن، بەڵام ئێستا دەنگی مافخوازی خەڵک زووڵاڵتر لە هەمیشە لە گوێی خەڵکی دنیادا دەزرینگێتەوە.
لە ساڵی ١٣٩٦دا دنیا شاهێدی پێکهاتنی گەورەترین و شوێندانەرترین ئاڵوگۆڕی سیاسی و کۆمەڵایەتی لە پانتایی ئێراندا بوو، ڕاپەرینی خەڵکی ئێران لەم ساڵەدا کە ڕێژیم و دەست وپێوەندەکانی هەوڵیاندا لە چوارچێوەی گرانی و قەیرانی ئابووریدا پێناسەی بۆ بکەن، بوومەلەرزەیەک بوو کە پاش چەند دەیە لە دەسەڵاتداری ئەو ڕێژیمە کۆڵەکە فکری و فەلسەفییەکانی حکوومەتی تێک ڕووخاند و ڕووی راستەقینەی کۆماری ئیسلامی لە دەرەوە و ناوەوە بۆ هەمووان ئاشکراتر کرد.
ئەگەر لە ماوەی چل ساڵی رابردوودا رێژیم دڵی بەوە خۆش کردبوو کە نەسڵێکی نوێ لەژێر تەعالیمی ئیسلامی شیعەی ویلایەتی فەقیهی پەروەردە کردووە و ئەو نەسڵە گەرەنتی حکوومەتێکی هەتاهەتایی ڕێژیم دەبێ، کچان و ژنانی بوێر و گۆڕانخواز، هەر لەم نەسڵە دژی فەلسەفەی سەرپۆشی زۆرەملی لە مەیدانە پڕحەشیمەتەکانی تاران سەرپۆشەکانیان لە سەر لابرد و بە دارێکەوە بەرزیان کردەوە، بە نیشانەی پووچەڵ کردنەوەی تەعالیمی چل ساڵەی ڕێژیم.
ئەگەر لە ماوەی ئەو ساڵانەدا بە شانۆگەری و خەڵک هەڵخەڵەتاندن، ویستی دنیا وا حاڵی بکا کە ڕێژیم ڕێفۆرمهەڵگرە و هەنگاوبەهەنگاو بەرەو چاکسازی دەچێ و ڕێفۆرمیستەکان بلیندگۆی ئەم سیاسەتە فریوکارانەیە بوون، خوێندکاران لە زانکۆی تاران هاواریان کرد " ئیسڵاح تەڵەب، ئوسوولگەرا، حکایەتی ئێوە کۆتایی هات"، بەم چەشنە ئەم سێحرەی ڕێژیمی جادووگەریان هەڵوەشاندەوە، ئەم دروشمە هەمان خولیا و ئامانجێكە كە دەیان ساڵە حیزبی دێموكرات هەوڵی داوە ئەو ڕاستییە بۆ خەڵكی ئێران ڕوون بكاتەوە كە كێشەی بونیادی لە ئێران كۆماری ئیسلامییە، نەك ڕێفۆرمخواز و موحافیزه‌كار؛ ئەم ئاڵوگۆڕانە هاوکات بوون لەگەڵ گرژبوونی دونیای دەرەوە بەرانبەر بە كۆماری ئیسلامی، بۆیە كۆماری ئیسلامی زیاتر لە جاران دڕ بووە و توندوتیژتر سەركووتی خەڵك دەكات. لە سەركووتی دەسبەسەركراوانی راپەرینەكەوە بگرە تا كوشتنیان لە زیندانەكاندا؛ هەموو ئەمانە پێمان دەڵێ كە كۆماری ئیسلامی ئیتر ناتوانێ بە ناوی پێکهێنانی ئاڵوگۆڕی بەرچاو لە وڵات، چاکسازی هەنگاو بە هەنگاو یان پاراستنی ئەمنییەتی ئێرانەوە خەڵك بەلاڕێدا ببات.
ئێمە تێکۆشەران و ئازادیخوازانی کورد شانبەشانی هەموو ئازادیخوازانی ئێران تا گەیشتن بە ئامانجەکانی گەل کە ڕزگاربوون لە چنگ ئەو ڕێژیمەیە، ناوەستین و دڵنیاین کە لە کۆتاییدا سەرکەوتن هەر بۆ ئێمەیە و نەمان بۆ ڕێژیمی دژی مرۆڤایەتی کۆماری ئیسلامیی ئێرانە.
جارێکی دیکە نەورۆزی ڕازاوە و ساڵی تازەتان پیرۆز بێ.
