کوردستان میدیا: ناوەندی هاوکاریی حیزبەکانی کوردستانی ئێران له ساڵڕۆژی فەرمانی جیهادیی خومەینی بۆ سەر کوردستان پەیامێکیان بڵاو کردەوە.
دەقی بەیانییەکە بەم چەشنەیە:
٢٨ی گه‌ڵاوێژ ساڵڕۆژی ٤٠ ساڵه‌ی فه‌رمانی جیهادی خومه‌ینییه و هێرش بۆ سه‌ر خه‌ڵكی ئازادیخوازی كوردستان
كۆمه‌ڵانی خه‌ڵكی كوردستان!
هاونیشتمانانی خۆڕاگر و خۆشه‌ویستی كوردستان
٤٠ ساڵ له‌مه‌وبه‌ر و له ٢٨ی گه‌ڵاوێژی ساڵی ١٣٥٨ی هه‌تاوی خومه‌ینی ڕێبه‌ری تازه به ده‌سه‌ڵات گه‌یشتووی كۆماری ئیسلامی پاش ٩ مانگ حوكمڕانی بە دەرکردنی فتوا بەدناوەکەی دژ به خەڵکی ئازادیخواز و بیرجیاوازی کوردستان، بە کردەوە ڕێگای بۆ قەڵاچۆکردنی خەڵکی بێتاوانی کوردستان و ئازادیخوازن بە شێوەی جۆراوجۆری وەک دادگای سەحرایی خەڵخاڵی و بریاری ئێعدامی سەرانی ئەحزاب و کوشتاری خەڵکی ئاسایی کوردستان و به بیانووی بێبنه‌ما و تۆمه‌ت و بوختانی هه‌ڵبه‌ستراو، له‌شكركێشییه‌كی به‌ربڵاوی بۆ سه‌ر خاک و خه‌ڵكی كوردستان ده‌سپێكرد.
ڕێژیمێک كه له تاریكایی مێژووڕا هاتبوو و خه‌ونی نیگریسی بۆ كۆمه‌ڵگای ئێران بۆ بردنی بۆ ناو تاریکخانە‌ی سه‌ده‌كانی ناوه‌ڕاست هه‌بوو، نه‌یده‌توانی كوردستانێک قبووڵ بكا كه له‌و ماوه كورته‌ی دوای سه‌ركه‌وتنی شۆڕشی گه‌ڵانی ئێران هەتا ٢٨ی گه‌ڵاوێژ واته له ماوه‌ی كه‌متر له ساڵێک، سه‌ره‌ڕای كه‌م ئه‌زموونی له ئیداره‌ی وڵات وحوكمڕانی، كوردستانی به‌وپه‌ڕی ئارامی و سه‌قامگیری ئیداره ده‌كرد و له‌وماوه كورته‌دا و سه‌ره‌ڕای گه‌مارۆی ئابووری له لایه‌ن ناوه‌نده‌وه كوردستان ببوو به نمونه‌ی ناوچه‌یه‌كی ئازاد و دێمۆكراتیك و وه‌ک مۆدێلێكی ئالترناتیو بۆ هه‌موو ئێران چاوی لێده‌كرا. نوێنه‌رانی شار و دێهاته‌كانی به ده‌نگی ئازادانه‌ی خه‌ڵك هه‌ڵبژێردرابوون و ئه‌نجوومه‌نه سینفیه‌كان ده‌وری خۆیان ده‌گێڕا و دابینكردنی مافی یه‌كسانی بۆ ژنان له ده‌ستووری كۆمه‌ڵگای كوردستان كه ئه‌زموونی كۆمه‌ڵگایه‌كی سێكولاری تێپه‌ر ده‌كرد ببوو به چه‌قڵی چاوی حاكمانی كۆماری ئیسلامی. نیگه‌رانی له به‌هێزتربوونی ئه‌م ئه‌زموونه هانده‌ری سه‌ره‌كی كۆماری ئیسلامی بوو بۆ له‌شكركێشی و هێرش بۆ سه‌ر خه‌ڵك و خاكی كوردستان. له بیرمان نه‌چێت كه هه‌رئه‌و جۆره‌ی چاوەڕوان ده‌كرا ته‌نانه‌ت ئه‌و هێزانه‌ی به بیانووی پڕوپووچ وه‌ک خه‌بات له دژی ئامریكا و شتی له‌و بابه‌ته چوونه پاڵ كۆماری ئیسلامی و پشتیوانیان لێكرد و له دژی بزووتنه‌وه‌ی كوردستان ده‌ستیاندایه دوژمنكاری، دوایی كه‌وتنه به‌ر گورزی سه‌ركوتی كۆماری ئیسلامی و قوربانی غه‌زه‌بی ده‌سه‌ڵاتی ئایینی كۆنه‌پارێز.
به‌هه‌موو ئه‌وانه‌شه‌وه و سه‌ره‌ڕای توانایی زۆرتری ئیمكانیات و كه‌ره‌سه‌ی نیزامی، به‌ڵام ده‌توانین به شانازیه‌وه بڵێین كه ٢٨ی گه‌ڵاوێژ له هه‌مان كاتدا ڕۆژی به‌ره‌نگاری و ئێراده‌ی نه‌ته‌وه‌ی كورد بوو بۆ خه‌بات له دژی سه‌ره‌ڕۆیی و سه‌ركووت. هه‌موو شاخ و دۆڵ و دێهات و شاره‌كانی كوردستان بوون به سه‌نگه‌ری به‌رگری و مقاو‌مه‌ت و له‌و ڕێگایه‌دا گه‌لێک شانازی مه‌زن و شكۆدار له لایه‌ن جه‌ماوه‌ری خه‌باتكار و هێزی پێشمه‌رگه‌وه تۆمار كران.
ئێستا و پاش تێپەربوونی ٤٠ ساڵ بە سەر تەمەنی کۆماری ئیسلامیی ئێران؛ ئێران لە بارودۆخێکی ناسەقامگیر دایە و حاکمیەت بە گشتیی کەوتووه‌تە ژێر گوشاری یەک جار زۆری وڵاتانی ڕۆژئاوایی و ناوچەیی لە لایەک و خەڵکی مافخوراوی ناوخۆی ئێرانش لە لایەکی تر و هەتا دێت ئەم گوشارانە زیاتر دەکات. لە لایەک زێدەخوازییە ناوچەییەکانی ئێران و دەستێوەردانی لە وڵاتانی دراوسێ و جیهان و داڵدە دان و پشتیوانی کردنی تێرۆریزم، کێشەی ئەتۆمی و مووشەک دوورهاوێژەکانی بوونەتە قەیرانی گەورە و هۆکاری گەمارۆ ئابوورییەکان و کێشەی دەرەکی و لایەکی تر ناکارامەی سیاسی، سیستمی بەربڵاوی رانتخۆری-مافیایی ئابووری، سەرکوتی بیرجیاوازان و کێشەی ناوخۆیی باڵەکانی دەسەڵات و دەیان هۆکاری تری ناوخۆیی ئێرانی گەیاندۆتە ئەم باردۆخەی ئێستا.
ناڕەزایەتییەکانی ئەم ٢ ساڵەی ڕابردوو دەرخەری ئەم راستییەن کە تا دێت خەڵکی ئێران لە چاکسازی لە ناو سیستەمی حاکم بێ هیواتر دەبن و ڕۆژ لە دوای ڕۆژ قورسایی ژیان لە ناو ئەم دام و دەزگایە زیاتر دەکەوێتە سەر شانی خەڵک و پتر هەست بە بێ چارەنووسی دەکەن، بەڵام هیوا بە خۆی خەڵک بۆ بەرەنگار بوونەوە لە بەرانبەر حاکمیەت ڕوو لە هەڵکشانە و لە لایەکی دیکەش بۆ جارێکیتر هەتا بەرەوپێش دەچین ئاڵقەی دژبەرانی و دوژمنانی دەرەکیی ئێران بەربڵاوتر و ئاڵقەی دۆستانی تەنگتر دەبێتەوە.
لە نیهایەتدا هیچ دەسەڵاتێک نییە کە توانیبێتی هەتا کۆتایی بە گوشار و سەرکوت و ئێعدام درێژە بە ژیانی خۆی بدات و ئەوە هێز و وزە و ئیرادەی جەماوەرە کە چارەنووسی هەر کۆمەڵگایەک دیاری دەکات. بە دڵنیاییەوە کۆماری ئیسلامیی ئێرانیش هەر بەم ڕێچکە مێژووییەدا دەڕوات کە هەموو ڕێژیمێکی دیکتاتۆر و سەرکوتکەر و داپلۆسێنەر پێیدا ڕۆیشتوون و سەرکەوتن بۆ ئەو کەسانەیە کە بە بێ هیچ دوودڵییەک بەرانبەر وەها دەسەڵاتێک دەوەستنەوە.
دیارە دوای ٤٠ ساڵ خەڵکی کوردستان هەر بە ورەی سەردەمی شۆڕشی گەلانی ئێران بگرە زیاتریش درێژە بە نا فەرمانی خۆیان بەرانبەر کۆماری ئیسلامی دەدەن. بە هەموو ئەو گۆڕانکارییانەی کە بە درێژایی ئەو ساڵانە بەسەر کۆمەڵگای کوردستان و ئێران هاتووە دەیان جار بەبەر چاوی هەموو لایەکەوە خەڵکی کوردستان بەرانبەر ئەو ڕێژیمە وەستاونەوە و نیشانیان داوە کە ئێستاش کوردستان هەر سەنگەری مقاومەتی ئێرانە و خەڵکی کوردستانیش شۆڕشگێرانی پێشرەوی ئەو ڕێگایەن.
ناوەندی هاوکاریی حیزبەکانی کوردستانی ئێرانیش یەکدەنگتر لە هەمیشە و بەرچاوڕوونتر لە ڕابردوو بەرەو یەکگرتوویی زیاتری نێوان کۆمەڵگا و هێزە سیاسییەکان هەنگاو دەنێ پشت بەستوو بە پشتیوانی بەربڵاوی کۆمەڵانی خەڵکی کوردستان دەروانێتە داهاتووییەکی گەشاوە بۆ خەڵکی بەشمەینەتی کوردستان و ئێران.
ناوه‌ندی هاوكاریی حیزبه‌كانی كوردستانی ئێران
٢٨ی گه‌لاوێژی ١٣٩٨ی هه‌تاوی
