دیار
لە درسیمەو بگر تا بەختیاری وەختییگ دەس بەید ئەڕای سازییگ یا گووش تەکنیدە مەقام و ملودییگ، هەر کوردییگ لە سەرایسەرێ کوردستان لە دەروون خوەی هەست هاوبەشی کەی و ئەگەرییش وە تەمامی لە تکست و شێعرەگان حاڵی نەود وەلی مووسیقای کوردی نیەتونێد خوەی لا بییەی و ڕیتم و نوتەگان و مەقامەگان وەگەردێ دیروک و فەرهەنگ و کۆمەڵگای کوردەواری سەرچاوە لە یەک بنەچەک گرن.
وەختییگ داڵگییگ لایە لایە کەی و خەمبارییگ کزە تیەرێ و بەختەوەرییگ شادمانی کەی وەلێ مووسیقای کوردی، هوێچ کوردستانییگ پەیدا نیەکەید ک وەگەردێ لایە لایەگە ئارامەو نەود و لە کزەگە خەم دەروونی نەگرید و لە شادمانی خوەشی نەکەید.
لەی ڕووژەیلە لەسەر سوشیال میدیا گورانی خوەنینێ بلیمەتییگ ک گرفتارێ مادەی هوشبەر بییە و لە خیاوانەگان دەروەدەرە، شوکیگ دادە هەست کوردانەی گشتمان.
دەنگییگ پڕ لە سووز و خەم وەگەردێ سیماییگ دامڕیای و پڕ لە پەیام نەهامەتی گورانی ماموستا حەسەن زیرەک خوەنید و هەر ئەو جوورە ک باس کەی جوورێ بیستوین دایم سەری ها وە تەم و لە دابڕیان و تەنیایی و دڵدارییگ قسە کەی ک وە ئاکام نەڕەسییە.
لەی ڕووژەیلە هەرکەس لە نووڕینیگ شیکاری کرد ئەڕای ئەو دەنگ و سیما و کەم کەسییگ بین ک توینستن لە وەرایوەرێ بیدەنگ بوون.
وە ڕاسی ئەڕا ئیلخان بابایی وەو دەنگێە گشتمان هاوردە دەنگ؟
ئەڕا نەک لە هەرسین و کرماشان بەڵکە لە باشوور و باکوور کوردستانیش وە دەمێ ئەو دەنگە هاتن؟
سیمای ئیلخان بابایی و ژیانی چ پەیامییگ ئەڕامان درێد؟
لێرە لە ڕاسای گەورایی و پڕ بوێن مووسیقای کوردی هەرچی بویشیمن کەمە، وەلی باس سەرەکی لێرە ئیلخان و ژیانێە ک یەک نموونە لە هزاران کەسییگە ک لە کوردستان ک پڕن لە توانایی و زانایی و ئستعداد و بلیمەتەیلییگ ک دەنگیان کپ کریاس و دەروەدەر بینە و ژیانیان وە ناکامی وە ئاخر ڕەسییە.
ئیلخان زادەی هەڵکەفتەی جوغرافیاییگە ک ئەڕای ئێمەی کورد خاڵ هاوبەشێ یەکگرتنمانە و ئەڕای داگیرکەر شوین شەڕ و خاڵییگە ئەڕای دابڕانمان لە یەکتر، ئیلخان گوویشوەرێ زاراوەی لەکییە، ک ئەڕای ئێمە بنەوای زوانیمانە و داگیرکەر ڕخی وەلێ چوود، ئیلخان لە فەرهەنگیگە ک لە بەختیاری تا باکوور یەکدەسە.
ئیلخان زامدارێ عەقڵیەت فاشیستی و سیستم کولونیالیستی و قوربانیی ناوەندگرایی و تاڵانە، تاڵ تاڵ مووی چەرمگ ئیلخان و خەت وە خەتێ چین و چرووکەیل دەم و چاوی چیروکییگ لە پاوەگەزدانن، ک وەی هەمکە زوڵم و ستەم و هەوڵ ئەڕای دابڕیان لوڕستان و لەک، ئیلخان خەم خوەی و پەیام خوەی لە ڕێ گورانی سۆرانی لە گەورا مووسیقیدانییگ جوورێ حەسەن زیرەک باس کەی.
ئیلخان درێ ئوشێد ک وەی هەمکە زامە ک لە داگیرکەر خواردییە، هیمان وساس و هاوار کەی و نیەتوای لەبەین بچوود، وە لەرزەی تارەیل ناو قوڕگی، لەرزە خستە گیان گشتمان و تەکانییگ دادە داگیرکەرەیل ک هەرچییگ وەسەرمان بارن، ئێمە هەر کوردانە خوەنیمن.
ئیلخان وە شوکیگ ک دادە کۆمەڵگای کوردەواری، بیە بایس یە ک بەش فرەییگ لە کۆمەلگا پەیگیر بوون ک ئەو بلیمەتە ناوی چەس و لە کوورە ژیان کەی و چیو ژیان بەیدە سەر، وەختییگ شوونی گردن سەر وە کەلاوەییگ دراوردن لە ئاواییگ لە نوورئاوی لوڕستان ک هویچ خاڵییگ لە ئمکانات ژیان لە ناوی نیەکەفێدە وەرێ چەو، بنەماڵەییگ ک لە زوڵەماتێ شەو ژیانییگ پڕ لە نەهامەتی بەنە سەر و ئمڕووژ ژیەن و ئومیدییگ وە سووی خوەیان نەیرن و منالیەلییگ ک ئیلخان باوگیان فرەتر لە ساڵییگە سەر خوەی هەڵگردێە و ئاواری خیاوانەیلە و ژنییگ ک جەور ئیلخان کیشێد و بنەماڵەگەی بەیدە ڕێەو.
بەڵێ ئیلخان و بنەماڵەی دەروەدەرن و سروەت و سەرمایەی وڵاتیان وە تاڵان بەن و نەتەوەی فارس لە ناوڕاس ئێران خانانە ژیان کەن و شعر سەعدی خوەنن و تار ژەنن و گەز گەز باڵا کەن ئەڕای نەتەوەگەیان ک سەربەرزانە ژیان کەن.
لە کاخەگان و پنت هاوسەگانیان گورانی شەجەریان گرن و عارفانە مەولانا گووش دەن و ئیلخان لە خیاوانەگان دەروەدرە و گورانی گەورا هونەرمەند کورد حەسەن زیرەک خوەنێد ک شعر و ملودی و دەنگی بی وێنەس و هویچ کام لە وە ناو گەورایەیل مووسیقای فارسی نیەتوێنن شان بیەنە شانی.
حەسەن زیرەکییگ ک بەش خوەیشی ئاوارگی و دەروەدەری بی و ئیلخان و ئیلخانەگان هێمان ڕی و شوونی گرن.
ئیلخان بابایی ئی ڕاسییە ئەڕامان دەرخست ک تا کیان خوەمان نیاشتویمن و لە وڵات خوەمان ئازادانە ژیان نەکەیمن و دەسەڵاتداری داگیرکەر لەسەرمان بوود و کوردستانمان وە تاڵان بووەن، هەر بەشمان دەروەدەری و نەهامەتییە.
