ڕۆژی شەممە ڕێکەوتی ٢١ی گەلاوێژ، لەلایەن کۆمیتەی حیزبی دێموکراتی کوردستانی ئێران لە وڵاتی ئوتریش، بەبۆنەی پیرۆزکردنی یادی ٢٥ی گەلاوێژ، ٧٨ـەمین ساڵڕۆژی دامەزرانی حیزبی دێموکرات، بە بەشداریی ئەندامان و لایەنگرانی حیزب و نوێنەری بەشێک لە حیزبە کوردستانییەکان، ڕێوڕەسمێک بەڕێوە چوو.
سەرەتا وێڕای بەخێرهێنانی بەشداربووان لەلایەن حوسێن خاڵخاڵ، ئەندامی کۆمیتەی حیزب لە ئوتریش، بە سروودی نیشتمانیی ئەی ڕەقیب و ڕاگرتنی خولەکێک بێدەنگی بۆ ڕێزگرتن لە گیانی پاکی شەهیدانی کورد و کوردستان، بەرنامەکە دەستی پێ کرد.
پاشان پەیامی کۆمیتەی حیزب لە ئوتریش لەلایەن محەممەد فەقێ‌عەلی، پێشکەش کرا کە لە نێوئاخنی پەیامەکەدا ئاوڕێک لە بەشێک لە مێژووی پڕ لە شانازی و پڕ لە هەوراز و نشێوی ٧٨ ساڵ خەباتی بێ وچان و نەپساوەی حیزبی دێموکراتی کوردستانی ئێران درایەوە.
هەروەها لەلایەن کاک حەمەکەریم وەک نوێنەری یەکیەتیی نیشتمانیی کوردستان لە ئوتریش و کاک محەممەد شەریف وەک نوێنەری پارتی دێموکراتی کوردستانی سووریە، بروسکەی پیرۆزبایی پێشکەش کرا و هیوای بەردەوامی لە خەبات و سەرکەوتنیان بۆ حیزب خواست.
ڕێورەسمەکە بە ئاهەنگ و شادی و هەڵپەڕکێ کۆتایی پێ هات.
