یەكیەتیی پیشەیی مامۆستایانی كوردستانی ئێران، كۆمەڵیک ڕێكخراوی فەرهەنگی و مەدەنی، ژینگەپارێز و وەرزشی، سەبارەت بە بایكۆتی شاۆی هەڵبژاردنەکانی سەرۆکكۆماریی ڕێژیم، پەیامێکی هاوبەشیان بڵاو کردەوە.
دەقی پەیامەکە بەم چەشنەیە:
خەڵكی مافویستی كوردستان!
مامۆستایان و چالاكانی فەرهەنگی و مەدەنیی هێژا!
ژینگەپارێزان و وەرزشكاران و قوتابییان و خوێندكارانی ئازیز!
ئەزموونی ٤٥ ساڵ دەسەڵاتداریی ڕێژیمی كۆماری ئیسلامیی ئێران نیشانی داوە، كە ڕێژیم لە هەڵبژاردن وەک كەرەستەیەكی نادێموكراتیک و فریودەرانە و بۆ مانەوەی خۆی كەڵكی لێ وەردەگریت. بۆیە به‌شداریكردن له وه‌ها هه‌ڵبژاردنیكی ناڕەوادا، به مانای ڕه‌واییدان به دەسەڵاتداریی سەرەڕۆی عەلی خامنەییە و پێوه‌ندیی به چاره‌نووسی و مافە نەتەوەیی و سیاسییەكانی گەلانی ئێرانه‌وه نییه. هەر بۆیە گەلانی ئیران، فریوی دروشمە درویینەكانی كاندیداكانی سەرۆکكۆماری بۆ پێكهێنانی ئاڵوگۆڕ و ڕێفۆرم له سیستەمی كۆماری ئیسلامیدا ناخۆن. چونكە گەلانی ئێران دەزانن و بەو قەناعەتە گەیشتوون كە به هوی بوونی كه‌سێک وه‌كوو عەلی خامنەیی و بەیتی ڕێبەری و یاسایەكی بنه‌ڕه‌تیی نادێموكراتیک، هیچكام لەو بەربژێرانە توانای گۆڕان و ڕێفۆرمیان لە پێكهاتەی كۆماری ئیسلامی و یاساوڕیساكانیدا نییه. هەر بۆیە دوای ٤٥ ساڵ ئه‌زموونكردنی هه‌ڵبژاردن له چوارچێوه‌ی سیستەمی ناڕەوای كۆماری ئیسلامیدا، گەلانی ئێران و بە تایبەت خەڵكی ڕۆژهەڵاتی كوردستان به‌و قه‌ناعه‌ته گەیشتوون كه ئه‌و هه‌ڵبژاردنەش هیچ قازانج و پێوه‌ندییه‌كی به مافە سیاسی و نه‌ته‌وه‌ییەكانی گەلانی ئێرانه‌وه نییه.
مامۆستایان و چالاكانی مەدەنیی تێكۆشەر!
لە ئێستادا ئەركی مامۆستایان، چالاكانی فەرهەنگی و مەدەنی و وەرزشكارانە کە بۆ بەرچاوڕوونی و ڕەوشەنگەریی گەلانی ئێران لە فرت یوفێلی ڕێژیم و موهەندیسیكردنی هەڵبژاردن و كەڵكاوەژووی ناڕەوا لە بەشداریی خەڵک لە نااوەندەکانی دەنگدان، بۆ مەبەستی ناڕەوا و ڕەواییدانەوە بە دەسەڵاتداریی عەلی خامنەیی، زیاتر و قورسترە. هەر بۆیە دەبێ مامۆستایان و چالاكانی مەدەنی، بەوپەڕی فیداكاری و هەستی نیشتمانپەروەرانەوە بەرچاوڕوونی و ڕەوشەنگەری بدەن بە خەڵک كە مەبەست و ئامانجی ڕێژیم لە هەڵبژاردن و دیاریكردنی سەرۆکكۆمار، تەنیا كەڵكاژوو وەرگرتنە لە ڕیز و سەفی دەنگدەرانە بۆ ڕەوایدان بە دەسەڵاتی ناڕەوای عەلی خامنەییە. بۆیە دەبێ چالاكانی فەرهەنگی و مەدەنی لە هەر دەرفەتیكدا كە بۆیان دەرەخسێ خەڵک و كۆمەڵگەی گەلانی ئیران، لە شێوەی هەڵبژاردن لە نێوان مۆرەكانی ڕێژیم بۆ سەرۆکكۆماری، ئاگادار بكەنەوە و ڕەوشەنگەری بكەن كە هەڵبژاردنی سەرۆکكۆماری نە لە قازانج و بەرژەوەندیی سەروەریی نەتەوەیییە و نە هیچ دەسكەوتێكی نەتەوەیی و سیاسیی بۆ گەلانی ئێران هەیە.
ئەركی سەر شانی پێشڕەوانی خەباتی مەدەنی كوردە كە خەڵک ئاگادار بكەنەوە كە بۆ ڕیژیم گرینگ نییە كام بەربژێری ڕێژیم دەبی بە سەرۆکكۆمار، بەڵكوو ئامانجی ڕێژیم هێنانی خەڵك بۆ سەر سندووقەكانی دەنگدانە تا ڕەوایی نێوخۆی و نیونەتەوەی بە تایبەت پاش شۆڕشی ژینا بۆ ڕێژیمی كۆماری ئیسلامی مسۆگەر بكا و بێگێڕێتەوە. كەوابوو مامۆستایان و چالاكانی مەدەنی دەبێ لە پێگەی كۆمەڵایەتیی خۆیان كەڵک وەرگرن و بە ڕەوشەنگەریكردن بۆ خەڵک، نەهێڵن كاندیداكانی سەرۆکكۆماریی ڕێژیم، بازاڕگەرمی بۆ ڕاكێشانی خەڵک بۆ سەر سندووقی دەنگدان بكەن و ڕەوایی لەدەستچوو بۆ دەسەڵاتی خامنەیی بگێڕنەوە.
لە هەلومەرجی ئیستادا و پاش شۆڕشی ژینا، كە خەڵكی ڕۆژهەڵاتی كوردستان لە ڕاپەرین و شۆڕشی ژینادا، پێشەنگایەتیی خەباتی" ژن، ژیان، ئازادی"یان لە ئاستی گەلانی ئیراندا دەكرد و شەقامیان كردبوو بە سەنگەر و گۆڕەپانی ڕاپەرین و شۆڕشی شار، دەبێ ئەمجاریش، بە "نا" گوتن و بە بەشدارینەكردن لە هەڵبژاردنی ٨ی پووشپەڕی ئەمساڵدا بە یەکگرتوویی، بە وشیاری و بە دەروەستبوون بە ئامانجەكانی شۆڕشی ژینا و بە شێوەی مەدەنییانە، پێشەنگایەتیی بایكۆتی هەڵبژاردنی سەرۆکكۆماری لە كوردستاندا بكەن. هەروەها چونكە چالاكانی مەدەنیی كورد، هەمیشە پێشەنگی بزووتنەوە كۆمەڵایەتییەكان بوون، دەبێ ئەمجارەش بە پێشەنگایەتی و بایكۆتكردن، بیسەلمێنێ كە سەرۆکكۆمار، لە چوارچێوەی یاسایی بنەڕەتیی ڕێژیمی كۆماری ئیسلامیدا، مافە نەتەوەیی و سیاسییەكانی نەتەوەی كورد و نەتەوەكان و ئایینزاكانی دیكەی ئێرانی پێ چارەسەر ناكرێت.
هەر بۆیە ئێمە وەکوو یەكیەتیی پیشەیی مامۆستایانی كوردستانی ئیران و كۆمەڵیک لە چالاكی فەرهەنگی و مەدەنی، ژینگەپارێز و وەرزشكار، لەسەر ئەو بڕوا و باوەڕەین كە به‌شداریكردن له وه‌ها هه‌ڵبژاردنێكدا به مانای شەرعییەتدان و ڕه‌واییدانەوە به ئیدامەی دەسەڵاتداریی ناڕەوای عەلی خامنەیی و پێوه‌ندییەكی به مافە نەتەوەیی و سیاسییەكانی نه‌ته‌وه‌كانی ئێرانه‌وه نییه. بۆیە بایكۆتی هەڵبژاردنی سەرۆکكۆماری باشترین بژاردەیە.
یەكیەتی پیشەیی مامۆستایانی كوردستانی ئیران
كۆمەڵیك ڕێكخراوی مەدەنی، فەرهەنگی، ژینگەپارێز و وەرزشی لە ڕۆژهەڵاتی كوردستان
٢ی پوشپەڕی ١٤٠٣ی هەتاوی
