سمکۆ سەقزی
ئینسانی کورد بە پێوەری دیرۆکی و مێژوویی یەکێکە لە کۆنترین مرۆڤەکانی گۆی زەوی. نموونەی تازە و وایڕاڵ‌کراوی ئەم مێژووە دێرینە باسی ئەشکەوتی شانەدەرە،
شوێنی ئەم خاک و ژینگە بەپیتە کە لە زەین و دڵی خەڵکی کورددا ناوی کوردستانە، بە هۆی سیاسەتی کۆڵۆنیاڵی پارچە پارچە کراوە و بووەتە چوار بەشی دیار و دەیان پارچەی نەبینراو لە هێز و خێڵ و دەستە و عەشیرە.
زەینی کوردی لە نەزمێکی خەیاڵیدا ئەم چوار بەشە پێکەوە دەبەستێ و کوردستانێک لە خەیاڵی خۆیدا دەنەخشێنێ. بەڵام ڕیاڵ پولێتیک نە خەیاڵە و نە شێعر، عەقلیەتێکی ڕەقی بێڕەحمە، ئەو نەک دابەش بەڵکوو کوردستانی ئەنجن ئەنجن کردوە، ئەم دڕندەیی و سەرەڕۆییە بۆ سست و لاواز کردن و تواندەوەی کورد و داگیرکاری خاکەکەی بووە، سڕینەوەیەک کە خاکەکەش بیری بچێتەوە کە ناوی کوردستانە و دەیان شانەدەر و زێویەی هەیە.
هەر لەم چەند ساڵەی ڕابردوو نموونەی سڕینەوە لە عەفرین و کەرکووک و شەنگال بە شێوەی دیار و ئاشکرا ئەنجام درا و، لە بەرچاوی دنیا پرۆسەی ئەتکی میللەت و خاکەکەی ڕووماڵ کرا. لە بەشی ڕۆژهەڵات و زاگرۆسی خاکی کوردستانیش ئەم سیاسەتە بە دەستێکی شاراوەی دینامیکی دایمە کارایە، شاراوەیی سیاسەتی چەشنە ژینۆساید کە ڕێژیمی تاران لە کوردستان بەڕێوەی دەبات لە کارەساتی هەڵەبجە و نوگرەسەلماش جینایەتکارانەترە. ئەم دوژمنایەتییە ڕیشەییە بە هۆی ئاوەز و بیری باڵای ڕۆژهەڵاتە کە تا ئێستای لەگەڵ بێت تەنیا دەوڵەتی کوردی دامەزراندوە و هەموو هێما و سیمبولە نەتەوەییەکانی دژ بە ئەویتری کۆلۆنیاڵکاری ئافراندوە. دەکرێ ئەو هەوڵ بۆ کوشتارە لە دیدی ئەو ترس و خۆفەی تارانەوە چاو لێ بکرێت.
حکوومەتی تاران، بە شێوەی ساختە و دەسکاریکراو لە سیکلی کاتی بۆ نموونە دە ساڵ جارێک کۆمەڵگە تووشی قەیرانی گەورە و شۆکی ئابووری دەکات، هەڵاوسانی بەرهەمی شۆک، نەهامەت و ماڵوێرانی بەدی دێنێت، بۆ ئەم جینایەتە ئابوورییە، سیستەمی بانکی وەلی فەقیهی و مالیاتگر و باجگر وەکوو دز و چەتە سەر بە هەموو سووچ و قوژبن و گیرفانێک دەکەن. لە ڕوانینی یەکەمدا ئەم جەردەییە بۆ گیرفان بڕین و هەژارکردنی خەڵک دەبینرێ و دەزانرێت، حکوومەت هەمیشە وا بینراوە و وا خۆی نیشانداوە مایەپووچ و بێ داهاتە بەڵام لە شەڕی خۆ پێنەگیراوی مافیاکانیدا دەر کەوتووە ئەوەی بەلاشە لای مەلا دولارە.
حکوومەتی کۆڵۆنیاڵی تاران بەو هەژارکردنە ڕێکخراوەییەی لە کوردستان تەنیا ئامانجێک کە هەیەتی ئەوەیە کە تێچووی کوشتنی ئینسانی کورد کەم بکات و کەرامەتی کورد تووشی داشکاندن بێت. بۆ نموونە ئەگەر جیهادەکەی خومەینی ئاشکرا ڕاگەیەندرا و خەڵکی کوردیش ئاشکرا بەرگرییان کرد، ئێستا لەم جیهادە ئاپدەیت و نەوتراوەی خامنەیی ئەمری قەتلوعام زۆر بەرینتر لە کوردستان بەڕێوە دەچێت، بە بێکاری لە ڕادەبەدەری خەڵکی کورد هەر بەپێی ئاماری ڕێژیم، خەڵک ناچار بە ئیشی وەکوو کۆڵبەری دەکرێن. لەم وشە بڕوانن کۆڵبەر، وشەی خەڵقکراو تەنیا بۆ ئینسانی کورد، ئەم کۆڵبەرییە لە سەرەتادا لە لایەن دەستوپێوەندەکانی ڕێژیم وەکوو کار و کەسب پێناسە کرا و هانی لاوان درا تووشی ببن. دوای سەپاندنی شوناسی کۆڵبەری بە سەر نزیکەی ۲۰۰ هەزار کەس، دواتر دەوڵەتی ئیسلامیی تاران دەستی خۆی ئاوەڵا هێشت لە کوشتنیان کە بینراوە تەنانەت وەکوو ڕاوکردن و ڕابواردن سیلە لە کۆڵبەر گیراوە و تەقەیان لێ کراوە. ئەم بێڕێزیە بۆ دابینکردنی نان لە وڵاتێک کە تەنیا لە یەک پەروەندەدا نزیک بە ۲۰۰ هەزار میلیارد تمەنی تیدا دزرا، هەوڵێکی ئیستعمارییە بۆ کوشتن و تەسلیمکردن.
ئەگەر ئامارێکی ڕۆژانە و دەورەیی لە ئێعدام، ئێعتیادی بە لێشاو، کوشتنی کوڵبەر، کوشتن بە ڕووداوی هاتوچۆ و ڕێگاوبانی بەئەنقەست، کاوڵ یان کوشتن بە خۆکوژی لە کوردستانی ڕۆژهەڵات بگیرێت، دەردەکەوێت ئێمەی کورد لە دڵی ژینۆسایدێک‌داین؛
ژبنۆسایدێک کە ڕووی ئاتاتۆرک و بەعسی تەیاری و عەفلەقی سپی کردوە.
ئەم سیستمە توتالیتێرە سەرەڕای ۴۵ ساڵ جینایەت و خوڵقاندنی کارەسات، سەرەڕای خەرجکردنی سەدان میلیارد دۆلار بۆ دروستکردنی هیلالی شیعە و میلیشا و میحوەر و دەیان کەتایب و حیزبوڵڵای، بەڵام لە بەرانبەری خۆڕاگری زاگرۆس لە ماکۆ تا کووەشت و لەکستانی کوردستان ماوەتەوە، و پیلان دەگێرێ و کەتنی تازە دەنێتەوە.
شۆڕشی ژینا کە دەکرێ وەکوو درێژەی ڕۆحی بەرخۆدانی ڕاسانی چاو لێ بکرێت، یەک پەیامی دیار و زەق و ئاشکرای بە سیاسەتی چەپڵ و شاراوەی تاران بووە، ئەویش ئەوەیە کە ئینسانی کورد بە ئەشکنجە و سەرکوت و زیندان و برسیکردن و کوشتنیش تووشی شکست نابێت، و یەک دڵنیایی قایم ڕای گرتووە.
بێگومان خەونی شکستی ڕۆژهەڵات وەک چۆن خومەینی و خاڵخاڵی و ڕەئیسی بردیانە نێو گۆڕ، خامنەییش هەر بۆ گۆڕی دەبا.
