هەگبەی شاخ و شۆڕش (شەهید غەفوور هەمزەیی)

 

ئیمان بە زامم بێنە، بۆ خەڵکی شەقام سوورم
ئاگام لە ژانیانە، بەڵێ! نیزیکترین دوورم

 

برایم چووکەڵی

تا چه‌وساوان له‌ كۆڕی‌ خه‌بات و به‌ربه‌ره‌كانیدا‌ كۆ نه‌بن و له‌ به‌رانبه‌ر پێشێلكه‌رانی ‌مافەکانیاندا نه‌وه‌ستن و به‌گژ ناهه‌قیدا نه‌چنه‌وه‌، تا وڵاتپارێزان سینگیان به‌ گولله‌ی‌ شه‌وپه‌رستانی‌ دڵڕه‌ق و قین‌له‌زگ و دوژمنانی‌ ئازادییه‌وه‌ نه‌نێن، تا لاوه‌ به‌ هه‌ست و خوێن‌گه‌رمه‌كان پۆل پۆل نه‌بنه‌ قوربانیی‌ ویست و داخوازه‌ له‌مێژینه‌كانیان، تا لێشاوی‌ فرمێسك و خوێن نه‌بێته‌ ده‌ریای‌ شه‌پۆلان و ته‌خت و به‌ختی‌ سه‌ركوتكه‌ران ڕانه‌ماڵێ‌؛ ئازادی‌ و به‌خته‌وه‌ری‌ نایه‌ته‌ به‌رهه‌م. مێژووی‌ پڕ له‌ شانازی‌ و سه‌روه‌ریی‌ حیزبی‌ دێموكرات پێمان دەڵێ له‌ ڕابردووی‌ خه‌باتی‌ ده‌یان ساڵه‌ی‌ پڕ له‌ فرمێسك و خوێن و دارماڵ له‌ حه‌ماسه ‌و خۆڕاگریی‌ خۆیدا، پشت ئه‌ستوور به‌ پشتیوانی‌ هه‌مه‌لایه‌نه‌ی‌ خه‌ڵكی‌ كوردستان و هێزی‌ باسك و ده‌ست و مه‌چه‌كی‌ ڕۆڵه‌ فیداكاره‌كانی‌ له‌ به‌رانبه‌ر داگیرکەراندا درێژه‌ی‌ به‌ خه‌بات داوه‌ و ماندوویی‌نه‌ناسانه‌ به‌ره‌و ترۆپكی‌ ڕزگاری‌ هه‌نگاوی‌ ناوه‌. "هەگبەی شاخ و شۆڕش"ی ئەم ژمارەیە بۆ باس لە یاد و بیرەوەریی غەفوور هەمزەیی، یەک لەو ڕۆڵە فیداکارانەی نەتەوەکەمان تەرخان کراوە.

غەفوور هەمزەیی ساڵی ١٣٢٣ی هەتاوی لە بناری ئاربابا، لە شاری بانە ‌و لە بنەماڵەیەکی مامناوەندی چاوی بە دنیای پڕ لە ڕەنج‌ و کوێرەوەری هەڵێنا. هەر لە شاری بانە خوێندنی سەرەتایی‌ و ناوەندیی تەواو کرد و ساڵی ١٣٣٨ چووە دانشسەرای مقەدەماتی ‌و پاش دوو ساڵ لە گوندەکانی ناوچەی بانە بۆتە مامۆستا‌ و دەرسی بە منداڵانی هەژار و بێدەرەتانی ئەو ناوچەیە گوتەوە. شەهید غەفوور هەمزەیی پاش ٧ ساڵ وانەوتنەوە لە کۆنکۆری زانستگە‌دا بەشداری کرد‌ و لە زانستگەی تەورێز وەرگیرا، پاش تێپەربوونی دەورانی زانستگە بەسەرکەوتوویی‌ و وەرگرتنی لیسانسی ئەدەبیاتی زمانی فارسی، گەڕاوە شاری بانە و لە یەکێک لە دەبیرستانەکانی ئەو شارەدا دەرسی گوتەوە.

غەفوور هەمزەیی ساڵی ١٣٥٦ی هەتاوی پێوەندیی بە حیزبی دێموکراتی کوردستانەوە گرت ‌و وەک ئەندامێکی تێکۆشەری حیزبی دێموکرات دەستی بە کار و تێکۆشان کرد و لە خۆپێشاندانەکانی ساڵی ١٣٥٧دا وەک ڕووناکبیرێک، لاوانی بۆ خەبات و خۆپێشاندان هان دەدا. زۆری‌ نه‌كێشا ڕیژیمی‌ كۆماری‌ ئیسلامیی‌ تازه‌ به‌ ده‌سه‌ڵات‌گه‌یشتوو ویست و داخوازییه‌كانی‌ خه‌ڵكی کوردی به‌ ئاور و ئاسن وه‌ڵام دایه‌وه‌. ئەوە بوو شەهید غەفوور وێرای‌ زۆریه‌ك له‌ لاوانی‌ ئه‌و ئاو و خاكه‌ نه‌یتوانی‌ له‌ ئاست زوڵم‌وزۆریی‌ ڕێژیمی‌ ئاخوندی‌ ده‌رحه‌ق به‌ گه‌له‌كه‌ی‌ چاو هه‌ڵ‌نه‌برێ. بۆیە لە ڕیزەکانی حیزبدا بەئاشکرا دەستی بە خەبات کرد و به‌ ئیمانێكی‌ به‌هێزتر‌ و بیروباوه‌ڕێكی‌ قووڵتر قۆڵی‌ بۆ خه‌بات دژی‌ دوژمنانی‌ ئازادی گەلەکەی هه‌ڵماڵی‌. ئەو هه‌موو پله‌‌ و پایه‌یه‌كی‌ ئیداری ‌‌و هه‌ر جۆره‌ مه‌قام ‌و به‌رپرسایه‌تییه‌كی‌ لە کاری ماموستایەتی‌ به‌جێ‌ هێشت و پاشماوه‌ی‌ ژیانی‌ بۆ خه‌بات‌ و تێكۆشان له‌پێناوی‌ ڕزگاریی‌ هاونیشتمانانی‌ له‌ بێ‌مافی ‌‌و ژێرچه‌پۆكی ‌‌و دیكتاتۆری‌ ته‌رخان کرد. ساڵی ١٣٥٨ لە کۆنفرانسی کۆمیتە شارسانی بانە بە ئەندامی هەیئەتی ئیجرایی هەڵبژێردرا و ساڵی ١٣٦٠ وەک مشاویری کۆمیتەی ناوەندی دیاری کرا و پاشان بەرپرسایەتیی کۆمیتە شارستانی بانەیان پێ سپارد. ساڵی ١٣٦١ و ١٣٦٢ وەک بەرپرسی کۆمیتە شارستانی بۆکان دیاری کرا و لەو ناوچەیەش وەک کادرێکی هەڵسووڕ خزمەتێکی بەرچاوی کرد. لە کۆنگرەی ٦ی حیزب لە ساڵی ١٣٦٢ بە ئەندامی کۆمیتەی ناوەندی هەڵبژیردرا و تا کاتی شەهیدبوونی وەک ئەندامێکی بەتوانا و چالاکی ڕێبەری ئەرکی پێ ئەسپێردراوی بەڕێوە برد. ئەو له ‌ژیانی‌ سیاسییدا به ‌هه‌موو هه‌ست ‌و توانا‌ و فیداكارییه‌وه‌ تێكۆشا‌ و به‌ لێهاتووییه‌وه‌ پله‌كانی‌ سه‌ركه‌وتن له‌ ئه‌ركه‌ حیزبییه‌كانی‌ یه‌ك له‌دوای‌ یه‌ك بڕی‌.

شەهید غەفوور ساڵی ١٣٦٤ دوای کۆنگرەی ٧ بوو بە بەرپرسی پێوەندییەکانی حیزب لە شاری سۆلێمانی ‌و دواتر پێوەندییەکانی حیزب لە بەغدای پێ سپێردرا و ماوەی ٩ ساڵ ئەو ئەرکەی بە سەرکەوتوویی بەڕێوە برد. ئه‌و كوڕی‌ ڕۆژانی‌ ته‌نگانه‌ی‌ حیزب بوو، شێلگیر و نەسرەوتوو، و هەمیشە دەم بە پیکەنین ‌و لەکاتی کاری حیزبیدا زۆر جیدی بوو. تێکۆشەرێکی خاکەڕا، دڵپاك و مەشرەف‌خۆش، لێوەشاوە و‌ خۆشه‌ویست بوو، ئەو بە بەردەوامی هه‌وڵی‌ ده‌دا پله‌ی‌ زانیاریی‌ سیاسی‌ خۆی‌ به‌ره‌و سه‌ر به‌رێ و‌، به‌ ڕێكوپێكی‌ ئه‌و ئەرکەی بۆیان دیاری کردبوو به‌ڕێوه‌ ده‌برد‌. مخابن دەستی ڕەشی تێرۆر دەرفەتی نەدا زیاتر خزمەت بە گەل و نیشتمانەکەی بکا و ڕۆژی ١٣ی گەلاوێژی ساڵی ١٣٧٣ لە بەر دەرگای ماڵی خۆی لە شاری بەغدا کەوتە بەر دەستڕیژی تێرۆریستان و شەهید بوو.

بانە ئاورگە گەشەی تێکۆشان        

بانە مزگێنی دەری سوورپۆشان

 

هەر کەسێکی لە قەراغت ژیابێ         

کفرە گەر جارێ لە مردن دوابێ

 

سڵەمان بەگ لەسەران سەربەرزە     

دیمەنی جوانی گوڵی سەر عەرزە

 

جوان ‌و ڕووسوور و گەشە ئارمردە     

بۆ گەیشتن بە ئەوینم پردە

 

سەری بابۆسە لە گوێن سوورکێوە    

گوڵێ نەخشینی ژیانی پێوە

 

حەوتەوانە بە سەری سەربەرزی         

لانی ژینمانە بە چوار سەروەرزی

 

تاژەبان بانی سەری کوردانە           

قارەمان دەچنە سەری گوردانە

 

هەژدە دۆڵان بە خوێن ڕازاوە          

گەلێ قوربانیی هەژاری داوە

 

بادەدەن زەندی دەسی زۆرداری      

دادەدەن مەشقی خەبات ‌و یاری

 

حەمە، عوسمان ‌و عەلی سوورپۆشن  

ڕێگەیان کردەوە بە خوێنیان ڕۆشن

 

بانە چالاکی هەموو بەر چاون           

گیانفیدای دایکی جەرگسووتاون