کۆنفرانسی ساڵانەی یەکیەتیی ژنانی دێموکراتی کوردستان لە وڵاتی سوئێد بە بەشداریی زۆربەی ئەندامانی ئەو رێکخراوەیە بەڕێوەچوو.
لەو کۆنفڕانسەدا کە ڕۆژی شەممە، ٨ ی رەشەمە گیرا، سەرەتا خاتوو ئەسرین ئیسماعیلی، ئەندامی دەستەی بەرێوەبەریی کۆنفرانس بە کورتی باسی لە ئامانجی سەرەکیی گرتنی ئەو کۆنفرانسە کردو دوایە کۆنفڕانس بە سروودی نەتەوایەتیی ئەی ڕەقیب‌و خولەکێک بێدەنگی بۆ رێزگرتن لە شەهیدانی کوردستان دەستی بە کارەکانی کرد.
کۆنفڕانسی ساڵانەی یەکیەتیی ژنانی دێموکراتی کوردستان لە وڵاتی سوئێد بە وتاری خاتوو نەسرین محەممەدی، ئەندامی چالاکی یەکیەتیی ژنانی دێموکراتی کوردستان لە سوئێد کرایەوەو لە بڕگەیەکی دیکەی کاری کۆنفڕانس‌دا خاتوو سکاڵا حەکیم‌زادە، بەرپرسی تەشکیلاتی یەکیەتیی ژنانی دێموکراتی کوردستان لە وڵاتی سوئێد باسی لە چۆنیەتیی کاری ڕێکخراوەیی یەکیەتی ژنان‌و کۆمیتەی شارەکان‌و بەشداری ئەندامان و هەروەها چۆنیەتی بە دەنگەوە هاتنی بەشداران‌و کۆمیتەکان بە کاری کۆمیتەی گشتی لە وڵاتی سوئێد کرد.
لە بڕگەیەکی دیکەدا خاتوو لەیلا محەممەدی، ئەندامی کۆمیتەی بەرێوەبەری یەکیەتیی ژنانی دیموکراتی کوردستان لە سوئێد ڕاپۆرتی کارو چالاکی‌یەکانی ئەو ڕێکخراوەیەی لە نێوان دوو کۆنفرانس‌دا پێشکەش کردو ڕاپۆرتی دارایی کۆمیتە لەلایەن خاتوو کوێستان بابایی خوێندرایەوەو دواتر بەشدارانی کۆنفڕاسن بە گەرمی باسیان لەو سط ڕاپۆرتە کردو سەرنج‌و تێبینی‌یەکانی خۆیان لەو پێوندییەدا هێنایە بەرباس‌و بۆ کەمکردنەوەی کەموکوڕی‌یەکان کۆمەڵە پێشنیارێک گەڵاڵە کران‌و راپۆرتەکان پەسند کران.
لە بڕگەیەکی دیکەی کاری کۆنفڕانس‌دا باسێک لەلایەن خاتوو سۆزان فەتحی، ئەندامی کۆمیتەی بەرێوەبەری یەکیەتیی ژنانی دێموکراتی کوردستان لە پێوەندی لەگەڵ پێزانینی کۆمیتەی سۆئێد بە کارو تێکۆشانی ئەوانەی لە ماوەی نێوان دوو کۆنفرانس‌دا چالاکانە لەو رێکخراوەیەدا بەشداربوون، باسێکی پێشکێش کردو لەلایەن خاتوو شلێر حەسەن‌پوور، بەرپرسی ئەو ڕێکخراوەیە لەوحی رێزلێنانیان پێشکێش کرا.
باس لە بەرنامەو پێڕەوی نێوخۆی یەکیەتیی ژنانی دیموکرات لە وڵاتی سوئێد بڕگەیەکی دیکەی کاری کۆنفڕانس بوو کە دوای باس‌و لێکدانەوەی لەلایەن بەشدارانی کۆنفڕانسەوە، بەرنامەکە بۆ کارو داهاتووی نێوان دوو کۆنفرانس پەسەند کرایەوە.
لە دوایین بڕگەی کاری کۆنفڕانس‌دا خاتوو شوعلە قادری، ئەندامی کۆمیتەی ئامادەکاری کۆنفرانس باسێکی لە سەر بابەتی هەڵبژاردنی بەڕێوەبەریی نوێی رێکخراوەکەو کاری ئەو ڕێکخراوەیە‌و ئەرکی ئەندامان و ژنانی کورد پێشکێش کردو دواتر کۆمیتەیەکی نوێ بۆ بەڕێوەبەریی کار و چالاکیەکانی یەکیەتی ژنانی دێموکراتی کوردستان لە سوئید هەڵبژیردرا.
کۆنفرانسی ساڵانەی یەکیەتیی ژنانی دێموکراتی کوردستان لە وڵاتی سوئێد دواجار بەدەنگی بلاوێنی هونەرمەندی لاوو ئەندامی یەکیەتیی ژنانی دێموکرات خاتوو باوان کەریمی کۆتایی بە کارەکانی خۆی هێنا.
