رۆژی سیشەممە ٤ی رەزبەر لە شاری هەولێر سێیەمین دیداری ئینیستیوتی رۆژهەڵاتی ناوەڕاست بۆ توێژینەوە واتە "مێری" ، بە بەشداری ٥ سکرتێری رێکخراوەکانی رۆژهەڵاتی کوردستان بەڕێوەچوو.
لەودیدارەدا هەرکام لە بەرێزان ئیبراهیم عەلیزادە، سکرتێری حیزبی کۆمۆنیستی ئێران، لقی کوردستان- کۆمەلە؛ خالید عەزیزی، سکرتێری گشتیی حیزبی دێموکراتی کوردستان؛ مستەفا هیجری، سکرتێری گشتیی حیزبی دێموکراتی کوردستانی ئێران؛ عومەر ئێلخانیزادە، سکرتێری کۆمەڵەی زەحمەتکێشانی کوردستان و عەبدوڵڵای موهتەدی، سکرتێری گشتی کۆمەڵەی شۆڕشگێری زەحمەتکێشانی کوردستانی ئێران، لە پانلێک‌ا راوبۆچوونی خویان و حیزبەکەیان سەبارەت بە پرسە گرینگەکانی ئێران و کوردستان خستە بەرباس.
بەرێز خالید عەزیزی سکرتێری گشتیی حیزبی دێمۆکراتی کوردستان لە پانێلی دووەمی ئەو دیدارەدا بە هەڵسەنگاندنێکی کورت لەسەر دۆخی ناوچەکە بەتایبەتی وڵاتی ئێران و هەلومەرجی رۆژهەڵاتی کوردستان، بۆچوون وسیاسەتی حیزبەکەی بە وردی خستەڕوو، خالید عەزیزی بە لەبەرچاوگرتنی ململانێی مەزهەبی کە لە ناوچە هاتۆتە ئاراوە لەم بارەوە گوتی: "وڵاتانی عێراق، سوریە و تەنانەت تورکیەش بەرهەم و دەرەنجامی شەڕی یەکەمی جیهانین، بەڵام ئێران پاشخانێکی دوور و درێژی لە وڵاتداری و حکومەتداری هەیە. لەم دواییانەشدا فاکتەری ئایینی شێعە بووە بە بەشێک لە کێشەی دەسەڵات و قانوون و تەنانەت بەشێک لە شوناسی ئێرانی. واتە لە گەڵ دەسەڵات و وڵاتێک بەرەوڕووین کە لە سەر شوناسێکی دوو لا خۆی گرتووە. یەکەمیان پان‌ئێرانیزم و ناسیونالیزمی ئێرانی، دووهەمیان ئایینی شیعە. بەڵام لە ئێراندا ئایین و ئایینزای جۆراوجۆر هەیە. لە کوردستانیش هەم شیعە هەیە و هەم سوننەش هەیە. ئێمە هەوڵمان نەداوە لە ئایین بۆ کێشە لە گەڵ تاران کەڵک وەرگرین. بەڵکوو هەوڵمان داوە بە سازکردنی پردی پێوەندیی جۆراوجۆر لە نێوان رەنگاوڕەنگیەکان بچینە ناو پرۆسەی نەتەوەسازی لە رۆژهەڵاتی کوردستان".
سکرتێری حیزبی دێموکراتی کوردستان بە ئاوڕدانەوەیەک لە خەباتی سیاسیی حیزب و دۆخی ئێستاکەی کوردستان، جمۆجۆڵە مەدەنیەکانی بەرز نرخاندو، بە پێداگریی لەسەر خەباتی فرەرەهەندیی و شێوازەکانی سیاسەتی حیزب، رووبە ناوخۆی وڵات ڕایگەیاند؛ وەک حیزبی دێموکراتی کوردستان لە چەند ساڵی رابردوودا هەوڵمان داوە مادام ناتوانین وەک حیزبێکی قانوونی لە ناوخۆ چالاک بین و کۆماری ئیسلامی ئەو دەرفەتەی نەداوە، بایەخی زۆر بدەین بە خەباتی مەدەنی و جموجۆڵ لە ناوخۆی کوردستان. ئێمە لەو باوەڕە داین کە ئەگەر کۆماری ئیسلامی لە گەڵ سەدان هەزار و میلیۆنان خەڵک بەرەوڕوو بێتەوە، ئەو کاتەیە کە کێشەی کورد لە ناوخۆی ئێران دەتوانێ وا بکا کە حیسابی تایبەتی بۆ بکرێ.
لە روانگەی ئێمەوە هەموو جموجۆڵە نەتەوەیی و مەدەنییەکان لە کوردستان، کە خەڵک لە هەر دەرفەتێک بۆ دەرخستنی ئەم هەستە نەتەوەییە کەڵک وەردەگرێ، لە دایکبوونێکی دیکەیە. بەو جۆرە خەڵک بە شێوەیەکی گشتگیر و بە تێچوویەکی کەم ئەم پڕۆسەی نەتەوەسازیە بەرەو پێش دەبا.
بە باوەڕی من کۆماری ئیسلامی زۆر لەو خەباتە مەدەنیە نیگەرانە کە شوێنە گشتیەکان و چین‌وتوێژە جۆراوجۆرەکانی کۆمەڵگای کوردستانی گرتۆتەوە و سەرئێشەی بۆ دروست دەکا، هەتا جموجۆڵێکی چەکداری کە ئێمە لە رابردووشدا لەم بارەوە کەممان نەهێناوە.
ئێمە زەمانێک دەتوانین لە مەیدانی سەربازیدا کۆماری ئیسلامی بە چۆکدا بێنین و لەو رێگایەوە ناچاری بکەین گوێ لە خواستەکانی خەڵکی کوردستان بگرێ کە خەبات و تێکۆشانی چەکداریی ئێمە تێکەڵ بە خەباتی مەدەنی و جەماوەریمان لە ناوخۆی وڵات بێ.
