ڕۆژی ١٠ی خاکەلێوە کە ناوەزد کراوە بە ڕۆژی شەهیدان، لە ژێر نمەبارانی بەهاری و لە مەزارگەی شەهیدان و تێکۆشەرانی حیزبی دێموکرات لە کۆیە، یادوناوی سەرجەم فیداکارانی ڕێگای ئازادی کوردستان بەتایبەتی سەرۆک‌کۆماری شەهید، پێشەوا قازی محەممەد و هەڤاڵانی بەرز ڕاگیرا.
پاشنیوەڕۆی ڕۆژی شەممە ١٠ی خاکەلێوەی ٩٨ی هەتاویی بە ئامادەبوونی بەشێکی بەرچاو لە تێکۆشەران و کادرو پێشمەرگە و بەشێک لە بنەماڵەی سەربەرزی شەهیدانی حیزبی دێموکراتی کوردستان لە مەزارگەی شەهیدان، ڕێوڕەسمی تایبەت بە رۆژی ١٠ی خاکەلێوە بەڕێوەچوو.
سەرەتا دوای مەشق و ڕێژەی نیزامی پۆلێک لە پێشمەرگەکانی حیزبی دێموکراتی کوردستان، بەشداران لە سەر مەزاری شەهیدان کۆبوونەوە.
پاشان سروودی ورەبەخشی "ئەی شەهیدان" بە هاوکاری پۆلێک لە منداڵان و پێشمەرگەکانی ئەو حیزبە پێشکەش کرا.
دوای ڕاگرتنی خولەکێک بێدەنگی بۆ ڕێزلێنان لە شەهیدان ڕێبەر و سەرجەم شەهیدانی کوردستان، پێشکەشکاری ڕێوڕەسمەکە ژینا پاکدامەن داوای لە کەسایەتی دیار و تێکۆشەری دێرینی حیزبی دێموکراتی کوردستان بەڕێزکاک جەلیل گادانی کرد، هەتا تاجەگوڵینەی ئەمەگناسی لە سەر مەزاری شەهیدان دابنێ.
لە دڕێژەی ڕێوڕەسمەکە کاک حەسەن قادر‌زادە ئەندامی دەفتەری سیاسیی حیزبی دێموکراتی کوردستان پەیامی دەفتەری سیاسی خوێندەوە.
لە پەیامی دەفتەری سیاسیی حیزبی دێموکراتی کوردستان بە ئاماژەدان بە ڕووداوی دڵتەزێنی ١٧ی خەرمانان کە بۆ بە هۆی شەهیدکرانی پۆڵێک کادر و پێشمەرگەی حیزبی دێموکراتی کوردستان باس لە خەباتی خوێناویی گەلی کورد لە کوردستانی ئێرانی کرا بوو.
لە درێژەی ئەو پەیامەدا بە وەبیرهێنانەوەی ڕێنوێنی‌یەکانی ڕێبەرانی شەهید بەتایبەتی شەهید پێشەوا قازی محەممەد هاتبوو؛ وەک ڕێبەرانمان فەرموویانە ، ئێمە لە مێژە بڕیارمان داوە کە لە ڕۆژی شەهیداندا بۆ شەهیدانمان ناگرین، بەڵکوو لە سەر گڵکۆکەیان دەوەستین و قورس و قایم، پەیمان نوێ دەکەینەوە.
لە بەشێکی دیکە پەیامی دەفتەری سیاسیی حیزبی دێموکراتی کوردستان کە بە بۆنەی ١٠ی خاکەلێوە ئامادە کرابوو، هاتوە؛ ڕێژیمی کۆماری ئیسلامی لە گەڵ گرتنە دەستی جڵەوی دەسەڵات لە ئێراندا، بە حاشاکردن لە ماف و داوا ڕەواکانی گەڵی کورد و هێرشکردنە سەر کوردستان و گرتنەبەری سیاسەتی سەرکوت و زەبر و زەنگ ، زەرەر و زیانێکی زۆری بە خەڵکی کورد و نیشتمانی کوردان داوە.
بەڵام چوار دەیە سیاسەتی سەرکوت وهەوڵدان بۆ تواندنەوە، کورد نەک چووکی دانەهێناوە، بەڵکوو خەڵکی خەباتکاری کوردستان و هێزە سیاسییە شۆڕشگێڕەکانی، بە تایبەتی حیزبی دێموکراتی کوردستان ، بە خەبات و تێکۆشانی فرەچەشنی خۆیان و، لەگەڵ ئەوەی ئەو حیزبە زیاترین شەهیدی سوورخەڵاتی هەیە و زۆرترین قوربانی بۆ لە سەر ڕاگرتنی قەڵای خۆڕاگری و ماف‌ویستی گەلی کورد داوە، گەلێک سەروەری و حیماسەی تۆمار کردوەو، زۆرترین شوێنەواریشی لە سەر بردنەپێشی بزووتنەوەی سیاسی/ نەتوایەتیی خەڵکی کوردستان داناوە.
دوای پەیامی دەفتەری سیاسیی حیزبی دێموکراتی کوردستان لە بڕگەیەکی دیکەدا کەریم فەرخەپوور پێشمەرگەی قەڵەم بەدەست و هەست پاراوی نێو ڕیزەکانی حیزبی دێموکراتی کوردستان پەخشانە شێعرێکی پێشکەش بەو یادە کرد.
دوایین بڕگەی ئەو ڕێوڕەسمە دانان و پێشکەش کردنی گوڵی سووری وەفاداریی بوو لەسەر گڵکۆی شەهیدان و تێکۆشەرانی دێموکرات ، بەرز ڕاگرتنی یادی سەرجەم شەهیدانی کاروانی خەباتی نەپساوەی نەتەوەکەمان بوو
