پێگەی مەجلیسی شۆڕای ئیسلامی لە بازنەی دەسەڵاتی کۆماری ئیسلامیی ئێراندا
ڕۆژی چوارشەممە ١٨ی بەفرانباری ٩٨ی هەتاوی فڕۆکەیەکی جۆری ( بۆینگ ٧٣٧)ی ئۆكراینی لە گەشتی تاران ئۆکراین لە تاران کەوتە خوارەوە و کاردانەوەی جۆراوجۆری بەدوای خۆیدا هێنا.
فڕۆکەکە لە کاتی فڕین بەرەو ئۆکراین دوای ٣ خولەک کەوتە خوارەوە و هەموو سەرنشینەکانی کە ١٧٦ کەس بوون گیانیان لەدەستدا.
ڕێژیمی کۆماری ئیسلامیی ئێران وەک هەمیشە ویستی ئەو کارەساتەش بشارێتەوە و بە بیانووی کێشەی تکنیکی فڕۆکەکە، بیروڕای گشتی جیهان چەواشە بکات، بەڵام بە بڵاوبوونەوەی هێندێک کورتە ڤیدیۆ و ڕای چەند کەس لە پسپۆڕانی بواری فڕۆکەوانی گومانەکان لەسەر خستنە خوارەوەی مووشەکەکە لەلایەن کۆماری ئیسلامییەوە زیاتر بوون، هەر بۆیە چەند کۆمپانیا و چەند وڵاتێک ئامادەیی خۆیان بۆ لێکۆڵینەوە لەو ڕووداوە دەربڕی. سەرۆک وەزیرانی کانادا ڕۆژی پێنجشەممەی ڕابردوو ڕایگەیاند کە زانیارییان لەبەردەست دایە کە فڕۆکەکە بە مووشەکی هێزە چەکدارەکانی ئێران کەوتۆتە خوارەوە. لەگەڵ ئەوەی کە کاربەدەستانی ڕێژیمی کۆماری ئیسلامی هەر خەریکی ئینکاریی کردن بوون، بەڵام دوای ئەوەی کە زانیان ناتوانن پسپۆڕان و شارەزایان چەواشە بکەن، بەوپەڕی ڕووهەڵماڵاوییەوە دوای سێ ڕۆژ حاشاکردن و پەردەپۆش‌کردنی ڕووداوەکە، دانیان بەو ڕاستییە دانا کە لەلایەن مووشەکەکانی سپای پاسدارانەوە فڕۆکەکە خراوەتە خوارەوە.
حەسەن ڕووحانی سەرۆک کۆمار و محەممەد جەوادی زەریف وەزیری دەرەوەی ئێران دوای ٣ ڕۆژ ڕایانگەیاند کە بەهۆی هەڵەیەکی مرۆییەوە فڕۆکەکە تێک‌شکێنراوە. ئەو قسانەی ڕووحانی و زەریف لە کاتێکدایە کە هەر دوای ڕووداوەکە ویستیان کەیسەکە بەلاڕێدا بەرن و وەک ڕووداوەکانی نێوخۆ و هەوڵە دیپلۆماسییەکانیان بیروڕای گشتی چەواشە بکەن.
دوابەدوای ئەو ڕووداوە و ئاشکرابوونی چەند بەڵگەیەکی حاشاهەڵنەگر لە سەر خستنەخواری فڕۆکەکە و نائەمن بوونی ئاسمانی ئێران، چەند وڵاتێک و کۆمپانیا بە ناوبانگەکانی ئورووپا گەشتەکانیان بۆ ئەو وڵاتە ڕاگرت.
مایک پۆمپێئۆ وەزیری دەروەی ئەمریکا ڕایگەیاند کە ئامادەین بۆ هەر چەشنە هاوکارییەکی دەوڵەتی ئۆکڕاین بۆ لێکۆڵینەوە لە تێک‌شکاندنی فڕۆکە ئۆکراینییەکە.
نوێنەری کرمان لە مەجلیسی شورای ئیسلامی، گوتی: " خەڵک چ تاوانێکیان هەیە کە ئێمە ڕێبەریانین، تاکەی بەرپرسانی حکوومەت بەجێی دانانی کەسانی پسپۆر و شارەزا، بە خزمایەتی و دۆستایەتی کارمەند و بەرپرس دیاری دەکەن"؟ ناوبراو لە درێژەی وتەکانیدا گوتی: ناکرێ هەموو کێشە و گرفتەکان بخەیەنە ئەستۆی دژمن، ئەو لێدوان و هەڵوێستانە دەردی ئێمە چارە ناکەن".
هەر دوابەدوای ئەوەی کە ڕێژیم پێملی ئەوە بوو کە خۆیان فڕۆکەکەیان خستۆتە خوارەوە، ئەمیر عەلی حاجی زادە فەرماندەی گشتیی هەوافەزای سپای پاسداران وازی لە بەرپرسایەتییەکەی هێنا.
لە لایەکی دیکەوە حەمیدی بەعیدی نژاد باڵوێزی کۆماری ئیسلامی لە پەیامێکدا داوای لێبوردنی کرد، ئەوە لە کاتێکدایە کە ناوبراو پێشتر لەگەڵ ڕۆژنامەنووسێکی بریتانیایی زۆر بە توندی دژی ئەو کەسانە وەستایەوە کە باسیان لەوە دەکرد کە ئێران خۆی فڕۆکەکەی تێک‌شکاندووە.
شایانی باسە کە کاربەدەستانی ڕێژیم لە هەر شوێنێک و لە هەر پۆست و مەقامێکدا بن، بێ ئەوەی لە ڕووداوەکان بکۆڵنەوە و ڕاستییەکان بزانن، وەک تووتی قسەی کاربەدەستانی سەرووی خۆیان دووپات دەکەنەوە و لە چەواشەکاری و دووڕووییدا هەموویان لە جنسی یەک قوماشن.
