عەلی خامنەیی ڕێبەری کۆماری ئیسلامیی ئێران دوای هەشت ساڵ، ڕۆژی هەینی ٢٧ی بەفرانباری ئەمساڵ لە خوتبەکەیدا جەختی لەسەر دوژمنایەتی و ئاژاوەگێڕیەکانی لە جیهان و ناوچەکەدا کردەوە.
عەلی خامنەیی ڕێبەری کۆماری ئیسلامیی ئێران، بەهۆی ئەو دۆخە هەستیارەی کە لە نێوخۆ و دەرەوە سەبارەت بە سیاسەتەکانی ڕێژیمەکەی هاتۆتە پێش، دوای هەشت ساڵ بۆ جارێکیتر لە نوێژی هەینیدا دۆخی ناوخۆی ئێران و بۆچوون و سیاسەتەکانی ڕێژیمەکەی هێنایە بەرباس.
خامنەیی وێڕای پێداگریی لەسەر دژمنایەتی و وەدەرنانی ئەمریکا لە ناوچەکە، وڵاتانی ئورووپاییشی بە پێڕەوی سیاسەتەکانی ئەمریکا ناوبرد.
لەپێوەندی لەگەڵ خەڵکی ئێران و خۆپێشاندان و ناڕەزایەتییەکان ڕایگەیاند کە ئەوانەی وێنەی قاسم سلێمانیان دڕاند، گوتی ئەوانە ئێرانی نین و سەر بە بێگانەن. هەروەها لە پێوەندی لەگەڵ ئەوانەی کە دروشمی نە غەزە و نە لوبنان دەدەن، گوتی: " ئەوانە هیچیان بۆ ئێران نەکردوە، بەڵکوو ئەوە قاسم سلێمانی بوو کە گیانی فیدای ئێران کرد".
لەگەڵ قسەکانی خامنەیی، حەسەن ڕووحانی سەرۆک کۆماری ئێران لە نوێژی هەینی چووە دەرەوە کە هۆکارەکەی ڕوون نییە و شتێکی ئەوتۆی لەسەر باس نەکراوە.
لە پێوەندی لەگەڵ هەڕەشەکانی خامنەیی لە ئەمریکا، دۆناڵد تڕامپ سەرۆک کۆماری ئەمریکا لە تویتێکدا نووسی: " سنووری خۆت بزانە و ئاگات لە قسەکانت بێت" هەر لە تویتەکەیدا هۆشداریی داوەتە خامنەیی و نووسی: " ئەو کەسەی بە ڕێبەری باڵا ناودەبرێت کە بەم دواییە هێندە باڵا نەبووە، هێندێک قسەی ناشیرینی بە ویلایەتە یەکگرتووەکانی ئەمریکا و ئەوروپا گوتووە". تڕامپ ئاماژەی بەوە داوە کە ئابووریی ئێران وێران بووە و خەڵک لە نەهامەتیدا دەژین.
برایان هووک نوێنەری تایبەتی ئەمریکا بۆ کاروباری ئێران، لە کۆنفڕانسێکی ڕۆژنامەوانیدا گوتی: " کاتێک گوێمان لە هەڕەشەکانی ڕێبەری باڵای ئێران دەبێت سەرسام نابین. ئەوانە قسەی ئاسایین بۆ کاربەدەستانی ڕێژێمی ئێران، بەڵام ئەوەی دوای هێرشەکەی قاسم سلێمانی بینیمان ئەوە بوو کە ئەوان گوتیان ئەوە کۆتایی بە تۆڵەسەندنەوەی قاسم سلێمانی دێنێت، وادیارە ئێستا ئارام بوونەتەوە". ناوبراو لە بەشێکی دیکەی کۆنفڕانسە ڕۆژنامەوانییەکەدا گوتی: " ئێمە سوود لە سیاسەتی ئەوپەڕی گوشاری ئابووری و وەڵامدانەوەی سەربازی وەردەگرین ئەگەر بێتو هێرشمان بکرێتەسەر، ئەم سیاسەتەش سوودێکی زیاتری بۆ ئاشتی و سەقامگیریی ناوچەکە هەیە تا سیاسەتی سازشکردن لەگەڵ رێژێم". ناوبراو لە درێژەی قسەکانیدا گوتی: " ئێران ماوەی چل ساڵە سیاسەتی هێژموونخوازی پەیڕەو دەکا. ئەوان حاڵەتی لەو جۆرەیان نەبینیوە کە نەخێریان پێبگوترێت، سەرۆک ترامپ بەرامبەریان دەوەستێتەوە، بەجۆرێک کە پێشتر وێنەی نەبووە و ڕێژێمی ئێرانیش حەز بەوە ناکات".
سادقی زیباکەلام لەسەر قسەکانی خامنەیی بە بەرواردکردنی بەشداریی خەڵک لە بە خاک سپاردنی قاسم سلێمانی و خۆپێشاندانەکانی گەلانی ئێران دژی ڕێژیم، گوتی: " ئەگەر بەشداریی خەڵک پێوەر بێ، با لە کاتێکدا کە حکوومەت هەموو هەوڵی خۆی دەدا تا لایەنگرانی خۆی بۆ بەرنامەکانی کۆبکاتەوە، با ئیزن بە دژبەرانیش بدات هەتا ناڕەزایەتییەکانی خۆیان پیشان بدەن".
عەبباس میلانی، توێژەر و بەڕێوەبەری ناوەندی ئێرانناسیی زانستگەی ئستنفۆرد لە تویتێکدا نووسی: " هەینییەکی مێژوویی بوو، خامنەیی نەک هەر هیچ بەرپرسایەتییەکی لە ئەستۆ نەگرت، بەڵکوو هەموو ئەو قسە پووچ و بێ ناوەرۆکانەی دووپات کردەوە کە ماوەی چل ساڵە گوێمان لێی دەبێ".
