کوردستان میدیا: جێژنی شەوانی فەرهەنگی لە بورجی میلادی تاران، کارێکە بۆ دەست گرتن بەسەر ئیرادەی گشتی نەتەوەی کورد لە کوردستاندا.
لە مانگی گەلاوێژی ئەمساڵەوە هەتا ئێستا، لە بورجی میلادی تاران ڕێوڕەسمی جیاجیا بە ناوی شەوی فەرهەنگی کوردستان بەڕێوەچووە؛ بە وتەی بەرپرسان، ئەم ڕێوڕەسمانە لە چوارچێوەی میهرەجانی نەتەوەیی و بەمەبەستی ناساندنی توانایی و سەرنجڕاکێشییە گەشتیارییەکانی پارێزگای سنە بەڕێوەدەچێت.
بە وتەی سەید ئەحسەن عەلەوی، بەڕێوبەریی گشتی میراتی فەرهەنگی، پیشە دەستییەکان و گەشتیاریی سنە، لەم ڕێوڕەسمانەدا، چالاکانی پیشە دەستییەکان و ڕێنیشاندەرانی گەشتیاری بۆ ناساندنی تواناییەکانی پارێزگای سنە بەشدارییان کردووە.
یەکەمین شەوی فەرهەنگی کوردستان لە ڕێکەوتی ٥ی گەلاوێژ بەڕێوەچووە و دووهەمین شەویش لە ڕێکەوتی ٢ی خەرمانانی ئەمساڵدا بەڕێوە چوو. لە ڕێوڕەسمی شەوی فەرهەنگی کوردستان چەندین جۆری هەڵپەڕکێ نمایش دەکرێت، بەڵام نەک بەو مانایەی کە لە فەرهەنگی کورددا هەیە.
دوکتور مەسعود ڕۆستەمی، لێکۆڵەری سیاسی، لەم پێوەندییەدا بە ئاماژەدان بە فەلسەفەی هەڵپەڕکێ و شیکردنەوەی جیاوازییەکانی لەگەڵ سەما و بەراوردکردنی هەڵپەڕکێی بورجی میلاد بە هەڵپەڕکێی نەورۆزی تەنگیسەر، باسی لەوە کرد کە هەڵپەڕکێی تەنگیسەر شەڕی ئیرادەیە؛ لێوانلێوە لە ئازادیخوازی و نا وتن بە کۆیلەیی. هەڵپەڕکێی تەنگیسەر ریتمی بە پۆڵاییکردنی ئیرادەیە، ئیرادەیەک کە تەسلیمی ئێرادەی ئەویتر نەبووە و نابێ. کچان و کوڕانی تەنگیسەر بۆ ئازادی هەڵدەپەڕن و بە هەموو هێزیانەوە پێ بە سەر ئەرد دەکوتن و بە دوژمن ئەڵێن ئێرە کوردستانە. نەورۆزی تەنگیسەر نمایشی رۆحێکی هاوبەشە لە نێوان ئەوانەی کە بەشدارن؛ تەنانەت ئەوانەش کە هەڵناپەڕن بەشێکن لە ئێرادەی سەرکەوتن. بە پێچەوانەی تەنگیسەر، هەڵپەڕکێی بورجی میلاد، هەڵپەڕکێی ئێرادەیێکی تێکشکێندراوە کە ئەبێ کات و ساتێکی خۆش بۆ ئیرادەی سەرکەوتوو پێک بێنێ. هەموو ریتمەکانی هەڵپەرکێی بورجی میلاد، هەم بۆ هەڵپەرکێکەر و هەم بۆ چاولێکەر بێ مانایە؛ بۆیەش بە پێچەوانەی تەنگیسەر، هیچ جۆرە رۆحێکی بەکۆمەڵ لە هەڵپەڕکێی بورجی میلاد بەدی ناکرێ.
لێکۆڵەرانی سیاسی کوردستان لەو باوەڕەدان کە ڕێژیمی ئێران لە ڕێگەی میدیاکانییەوە و بەهۆی نەبوونی میدیای ئازاد، هەوڵی سەپاندنی فەرهەنگی زاڵی دەسەڵاتەکەی بەسەر تەواوی بەشەکانی ئێراندا دەدات و بۆ ئەنجامدانی ئەم کارەش کەڵک لە میدیا بەناو لۆکاڵییەکانی خۆی لە پارێزگاکان وەردەگرێت.
دەربڕینی چەمکگەلێکی وەک: "فرهنگ بومی"، قوم غیور، سەمای مەحەلی و زۆرێكی دی" لەلایەکەوە لە ڕاستای نەهادینەکردنی ئەندێشەی ژێردەسەڵاتی ناوەند بوونی پارێزگا و نەتەوەکانە و لەلایەکی دیکەشەوە بەڕێوەبردنی شەوانی فەرهەنگی ئەویش لە کاتە یەک لە دوای یەکەکان و لە شاری تاران بۆ ئەو پارێزگایانەی کە فەرهەنگی جیاوازییان لەگەڵ ناوەند هەیە، هەوڵێکە بۆ چەواشەکردنی بیرەکان لە پێوەندی لەگەڵ ڕێژیمی ئێران، کە گوایە ڕێژیم هەوڵ بۆ پێشخستن و گەشەسەندنی فەرهەنگی نەتەوەکانی دیکە دەدات.
