شەماڵ تەرغیبی
نەورۆز، هەر لە دێرزەمانەوە بۆ کورد وێڕای نوێبونەوەی سروشت دەرفەتێک بووە بۆ وەلانانی جیاوازییەکان لە فکر و ئایدیا و ڕەوشتی ڕۆژانە و لە هەمان کاتیشدا بەرەنگاربوونەوەی دەسەڵاتی ناڕەوای حاکم کە ویستوویەتی ستەمی خۆی بەردەوام بکات.
لەو ساڵانەی دواییدا جارێکی دیکە نەورۆز بووە هەنگاوێک بۆ بەرەنگاری و خەبات دژی داگیرکەران. ئەو هەنگاوەش پەیامی ڕاسانەوەی شۆڕش بە دژی دیکتاتۆریەتی حاکمە کە بە ڕاسان ناوزەد کرا.
نەورۆز و ڕاسان لە چییەتی خۆیاندا پێک دەگەن چونکە ژیانەوە و زیندووبوونەوە و هەڵدانەوە مانا دەکەن و هەر دووکیان مانا بە ژیان و واتا بە مرۆڤ دەبەخشن و لە زەمەن و مێژووشدا ئاوێتەی یەکتر بوون.
لە نەورۆزدا بوو کە پەیامی ڕاسانەوەی خەبات بە گەلی کورد درا و هاواری "ئیدی بەسە ژیانی ژێردەستەیی و ملکەچی" جارێکی دیکە بووە سەرەتای ڕاسانەوەی گەلێکی شایانی ئازادی و ڕزگاری.
لە نەورۆزدا بوو کە هاواری "شۆڕش ئەرکی هەمووانە" ، "دەبێ شاخ بەهێز بێ بۆ پاڵپشتی شار، شاریش دەبێ بخرۆشێ تا دژمن نەتوانێ زەفەر بە شاخ ببات"، دژمنی هەژاند و دایکی شەهیدی وەتەنی شاد کرد؛ "لێکگرێدانی خەباتی شاخ و شار" بوو بە فورمۆڵێکی پێشکەوتوو تا هیوا لە دڵی گەلدا بگەشێنێتەوە، لە نەورۆزدا بوو کە شار جامانەی شاخی لە مل کرد تا پێکەوە ببنە هەوێنی خەباتێکی پێشکەوتوو و هیوابەخش، هەر بۆیەش نەورۆز و شادییەکانی وا ئاوێتەی دۆزی ڕەوامان بوون کە هەر نەورۆزێک دەتوانێ هەنگاوێک لە ڕۆژی سەربەستیمان نزیکتر بکاتەوە.
نەورۆزی ئەمساڵمان جیاوازترە؛ نەورۆزی ئەمساڵ بەپێچەوانەی ساڵی پار کە خەڵک گیرۆدەی نەخۆشیی کۆرۆنا بوون و دەرەتانی پێکەوەبوون و لە دەوری یەکتر شایی گێڕانیان نەبوو دەبێ بکرێتە نەورۆزێک کە تێیدا وێڕای ڕەنگ و دەنگە جیاوازەکانمان بەڵام یەکگرتوو بین و پێکەوە بین تاکوو پێکەوەش ڕووبەڕووی سوڵتەی داگیرکەر ببینەوە و وەک لە نەریتی کۆن و دێرینماندا هەیە بە دڵ لەگەڵ ئازار و خەم و شادییەکانی یەکتر بین.
هەر لەو نەورۆزەشدا دەبێ دیسان ئەو وانە مێژووییە وەبیر داگیرکەران بێنینەوە کە نەورۆز بۆ ئێمە هێمای یەکبوون و یەکڕیزی نەتەوەییە چونکە دەزانین کە جگە لەمە هیچ ڕێگایەکی ترمان بۆ ڕزگاری نییە. نەورۆز بۆ ئێمە نوێنگەی سەرهەڵدان و ڕاسان و ڕابوون و نوێبوونەوەیە لە هەموو بارێکەوە. لەم نەورۆزەدا چاوگی ئاگر گەشاوەتر بە گژ ستەم و بێدادیدا دەکەین و ئاگری پڕتینی دەکەینە چقڵی چاوی دوژمنانمان چونکە هەمووان دەزانین کە داگیرکەر چەندە بەم ئاگرە و بەم لە دەوری یەک کۆبوونەوە و بەم یەکبوون و یەکڕیزییە قەڵسە و چەند پێی دۆشداماوە!
لە دێرزەمانەوە هەر چەند زوڵمی زاڵم زۆرتر بووە کوردیش شێلگیرتر بووە لە سەر شکستدانی، ئەمساڵیش لە کاتێکدا بەرەو نەورۆز دەڕۆین کە رێژیم تۆڵەی شکستە یەک لەدوای یەکەکانی خۆی لە هەموو بیاڤەکان، لە خەڵکی ئێران و لەو نێوانەشدا لە خەڵکی کوردستان بەتایبەتی دەکاتەوە؛ لاوانمان دەگرێت و حوکمی ناڕەوایان بەسەردا دەسەپێنێ و بنەماڵەکانمان داخدار دەکات و هەوڵیش دەدات کە ڕێوڕەسمی نەورۆزی دێرینمان بەڕێوە نەبەین؛ بۆیە دەبێ وەک ڕابردوو و باشتر لە پێشووش هەوڵ بۆ بەڕێوەبردنی ڕێوڕەسمی نەورۆز بدەین و لە هەمان کاتیشدا بنەماڵەی زیندانییە سیاسییەکان لە بیر نەکەین کە لەم ڕۆژی شادییەدا بەهۆی سیاسەتی چەوتی ڕێژیمەوە ڕۆڵەکانیان لە گرتوخانەدا سروودی سەربەستی دەچڕن و ئەوان مات و زیز کراون، نابێ بنەماڵەی شەهیدانی نیشتمانەکەمان لەبیر بکەین کە ڕۆڵەکانیان بۆ ئازادی ئەم ئاووخاکە گیانیان کردووەتە پردەبازی ئازادی؛ بەڵکوو دەبێ ئەم ئەرکە ئەخلاقی و نیشتمانیییە کە هی هەموو لایەکمانە وەبیر بێنینەوە کە بە سەردانیکردنیان هەم دڵنەواییان بدەینەوە و پێیان بڵێین گومانتان نەبێ کە ئێمە هەر لە سەنگەرداین و ناهێڵین خەونی ڕۆڵەکانتان بمرێ؛ هەمیش ئە و پەیامە بە دژمنی خاک و خەڵکمان بدەینەوە کە سەنگەر چۆڵ نییە و پێی بڵێین ئەی ڕەقیب هەر ماوە قەومی کوردزمان.
هەستی یەکگرتوویی خەڵک وەک هەمیشە بۆتە قەڵغانی بەرەنگاری و پاراستنی شار، هەر ئەو هەستەشە کە گەشە دەکات و سبەینێ ڕۆژی نەک دوور، کۆماری ئیسلامی بە زبڵدانی مێژوو دەسپێرێ.
لەم نەورۆزەدا وەک بڵێسەی ئاگری نەورۆز بە گژ دیکتاتۆر و پیلانەکانیدا دەچین و بەرەنگاری پەتا و نەخۆشییەکانی دەبینەوە. بە جەستە و بە دڵ لەگەڵ یەکتر بۆ یەک ئامانج تێدەکۆشین. ئێمەی کورد دانیشتووانی وڵاتی خۆر و نەوەکانی میدیاین و زۆر دیکتاتۆر و نەخۆشی و بەڵا دێن، بەڵام نامێننەوە ئەوەی دەمێنێتەوە کورد و کوردستانە کە هەمیشە لە هەر نەورۆزێکدا دەبوژێتەوە و تا ڕزگاری بە دەست نەهێنێ ناوەستێتەوە؛ ئەمە ئەو کەتوارە ڕاستەقینەیە کە ئێمە دەبێ بیزانین، کەتوارێک کە پەتای کۆماری ئیسلامی ساڵانێکە لێی تۆقیوە و بەردەوام هەوڵ دەدات دژی بوەستێتەوە. کەواتە پیرۆز بێ نەورۆزی هێمای یەکگرتوویی نەتەوەیی.
