کوردستان میدیا: دەزگای ڕێكخستنی گشتیی حیزبی دێموکراتی کوردستانی ئێران، سێمینارێكی تایبەتی بۆ هەر یەک لە بەڕێزان "كاوە بەهرامی"، ئەندامی دەستەی كارگێری و بەرپرسی دەزگای فەرماندەیی و "دارا ناتق" جێگری دەزگای ڕێكخستنی گشتیی حیزب سەبارەت بە ٤٠ ساڵەی دەسەڵاتداریی ڕێژیمی ئیسلامی ئێران بەڕێوە برد.
ڕۆژی پێنج شەممە، ڕێكەوتی ١٨ی ڕێبەندانی ١٣٩٧ی هەتاوی، دەزگای ڕێكخستنی گشتیی حیزب، سێمینارێكی تایبەتی سەبارەت بە چل ساڵەی تەمەنی ڕێژیمی كۆماری ئیسلامیی ئێران بۆ ئەندامانی حیزب لە یەکێک لە بنكەکانی حیزب لە کەمپی ئازادی بەڕێوە برد.
سێمینارەكە بە بەشداری هەر یەک لە ئەندامانی حیزب سەر بە كۆمیتەکانی زاگرۆس، ئازادی و كۆیە، كۆمیتەی یەكیەتی ژنان و لاوانی دێموكراتی كوردستانی ئێران لە ئازادی بەڕێوە چوو.
لەم سێمینارەدا، "كاوە بەهرامی"، ئەندامی دەستەی كارگێری و بەرپرسی دەزگای فەرماندەیی، باسێكی سەبارەت بە دۆخی خۆرهەڵاتی كوردستان لە ماوەی چوار دەیە لە داگیركاری كۆماری ئیسلامی و ستراتیژی خەباتی نەتەوەیی و حیزبی دێمۆكرات پێشكەش كرد.
دواتر "دارا ناتق" جێگری دەزگای ڕێكخستنی گشتیی حیزب، باسێكی سەبارەت بە چوار دەیە لە دەسەڵاتداری كۆماری ئیسلامی لە ڕەهەندەكانی ئابووری، سیاسی و كۆمەڵایەتیدا بۆ ئامادەبووان شرۆڤە كرد.
"بەهرامی" لە باسەكەیدا ئاماژەی بەوە كرد كە ڕێژیمی خومەینی هەر لە یەكەم ڕۆژی بەدەستەوەگرتنی دەسەڵات، سیاسەتی سەركوت و زەبر و زەنگی بەرامبەر بە نەتەوە بندەستەكان و یەک لەوان نەتەوەی كوردی گرتە پێش. دەركردنی فەرمانی جیهاد بە دژی گەلی كورد و خاپووركردن و قەڵاچۆكردنی گوند و شارەكانی كوردستان، ئاسمیلەكردنی فەرهەنگ و كلتووری كورد، گرتن و كوشتن و ئەشكەنجەكردنی لاوانی كورد، میلیتاریزەكردنی كوردستان بوو بە سیاسەتێكی دانەبڕاوی ڕێژیمی خومەینی. دزین و بە تاڵان بردنی سەروەت و سامانی كوردستان، قەدەغەكردنی چالاكیی سیاسی، سەركوتی ئازایخوازانی كوردستان، گۆرینی دێموگرافیای ناوچە كوردنشینەكان و دامەزراندنی دەیان ناوەندی ئەمنییەتی و سەركوتكەر لە كوردستاندا، بەشێک لە ستراتیژیی ئەو ڕێژیمە لە كوردستاندا بووە کە هەتا هەنووكەش بەردەوامە.
ناوبراو وتی: سەرەڕای زەبروزەنگ و سیاسەتی دوژمنكارانەی ڕێژیم لە كوردستاندا، خەباتی نەتەوەیی و ئازادیخوازانەی گەلی كورد هەروا بەردەوامە. ئیرادەی بەرخۆدان و شۆرشڤانی و مافخوازانەی نەتەوەكەمان هەروا بەهێز و بەهێزتر دەبێت. كوردستان هەمیشە مەتەرێزی ئازادیخوازی و بەربەرەكانێ بە دژی داگیركەرانی كوردستان بووە و ئاڵای خەبات هەروا شەكاوەیە. حیزبی دێموكرات، حیزبی خۆشەویستی كۆمەڵانی خەڵكی كوردستان هەروا لە مەیدانی خەبات بە دژی ڕێژیمی خومەینی تێدەكۆشێت و دەستە دەستە لاوانی كوردستان دێنە ڕیزی پێشمەرگایەتی و تێكۆشان بەردەوامە. ڕاسان وەک بزاڤێكی فڕەڕەهەند و گشتگیر لەپێناو سەرخستنی ئیرادەی بەرزی نەتەوەیی و وەدیهێنانی ئامانجە نەتەوەییەكانمان بەردەوامە و توانیویەتی لە ماوەیەكی كەمدا ستوونەكانی دیكتاتۆریەتی ڕێژیم لە كوردستاندا بە چۆكدا بێنێت.
دواتر "دارا ناتق" لە باسەكەیدا ئاماژەی بە دۆخی قەیراناوی كۆماری ئیسلامی لە ئاستی نێوخۆی و دەرەوە و هەرێمی دا كرد. ناوبراو وتی؛ لە ٢٢ی ڕێبەندانی ئەمساڵدا چل ساڵ بە سەر ڕووخانی ڕێژیمی پاشایەتی و بە تاڵان بردنی دەستكەوتەكانی شۆرشی گەلانی ئێران لە لایەن ڕێژیمی خۆمەینی یەوە تێدەپەرێت. چل ساڵ لەوەوپێش گەلانی ئازادیخوازی ئێران بە دژی سیاسەتی سەركوت و پێشلكردنی ماف و ئازادی گەلانی ژێر ستەم، داخرانی كەشی سیاسی، فەسادی ئیداری و ماڵی و ...هتد، ڕژانە سەر شەقام و بە هیوا و مەبەستی دەستەبەری ژیانێكی شیاو و سەردەمیانەتر و بە دروشمی نان، مسكن، ئازادی كۆتاییان بە سیستەمی پاشایەتی و دیكتاتۆری پێنج دەیەی بنەماڵەی پەهلەوی لە ئێراندا هێنا. لە هەلومەرجی ئەوكاتدا كە گەلانی ئێران سەرمەستی سەركەوتن بوون و كەم كەس هەبوو كە بیر لەوە بكاتەوە كە سیستەمی سیاسی داهاتووی ئێران چۆن دەبێ، بە هۆی ئامادەنەبوون و بێ بەرنامەی ئۆپۆزسیۆنی دێموكرات و پێشكەوتنخواز، دەرفەت بۆ "خومەینی" و ڕووحانییەتی شیعە ڕەخسا كە بە كەڵك وەرگرتنی خراپ لە هەستی ئایینی و ئایینزایی خەڵك بە سەر شەپۆلی ناڕەزایەتییەكانی خەڵكدا زاڵ بن و دەستكەوتەكانی شۆرش بە تاڵان ببەن و نیزامێكی ڕەشی مەزهەبی و ئیستبدادی بە سەر كۆمەڵگای ئێراندا بسەپێنن.
"ناتق" وتیشی، سەرەڕایی بەڵێنەكانی خومەینی بۆ دابین كردنی ئازادی لە ئێراندا و هەوڵدان بۆ خۆش بژێوی ژیان و ئاوەدانی وڵات و بە خۆرایی كردنی ئاو و بەرق و گاز و هێنانی پارەی نەوت بۆ سەر سفرەی خەڵك و زۆر وەعدە و بەڵێنی دیكە، نەتەنیا پابەند نەبوو بە هیچ یەك لە بەڵێنەكانی، بگرە دوای چل ساڵ لە دەسەڵاتی ئەم ڕێژیمە، كۆمەڵگای ئێران هەنووكە لە گەڵ قەیرانی قوڵی سیاسی، ئابووری و كۆمەڵایەتی بەرەوڕوویە. گرانی، بێكاری و هەژاریی لەلایەك و داماویی ڕێژیم لە دابینكردنی سەرەتایترین پێداویستییەكانی خەڵك لە لایەكی دیكەوە، كۆمەڵگای ئێرانی تووشی بێ هیوای و سەرهەڵدانی سەدان دیاردەی دزێوی كۆمەڵایەتی كردووە و شیرازەی بنەماڵە لە ئێراندا تێكچووە. كۆماری ئیسلامی لە بواری سیاسی و ئایینی یەوە ڕەوایی خۆی لە دەست داوە و تووشی قەیرانی حاكمییەت هاتووە.
دۆخی ئاڵۆز و قەیراناوی كۆماری ئیسلامی ئێران پاش چوار دەیە لە حوكمرانی كردن، لە ئاستی نێونەتەوەیی و نێوخۆیی و هەرێمی دا، لێكەوتەكانی ئەم قەیرانانە و پاشەرۆژی ڕێژیم و ئاڵوگۆرەكانی لەو پێوەندییەدا و ئەركی ئوپۆزسیۆن، باسێكی دیكە بوون كە بەڕێزیان ئاماژەی پێكرد.
