Kurdistanmedia

Malpera Navendî a Partiya Demokrat Kurdistana Îranê

PARTÎYA AZADÎYA KURDISTANÊ, bi hilkevta 25ê Gelawêjê peyamekî pîrozbahiyê bo PDKÎ şandiye

14:03 - 17 Tebax 2020

Ku di deqa wê peyamê de hatiye:  

PARTÎYA  AZADÎYA  KURDISTANÊ  

Birêz Kak Mustafa Hicrî

Berpirsê Giştî yê PDKÎ

Em 75emîn salvegera damezrandina HDK Îranê  pîroz dikin

HDK-Îran di 16ê tebaxa 1945ê de li Mehabadê bi serokatîya Pêşewa Qazî Mihamed hat damezirandin. HDK-Îranê îro 75emîn salvegera damezrandina  xwe pîroz dike.

HDK-Îran a ku li ser hîmê Komeleya Jîyanewey Kurd şax da, piştî çend mehan Komara Mahabadê ava kir û rêveberîya wê kir. 

HDK-Îran  ve 75 sal e hêzeke  esasî ye ku têkoşîna miletê  Kurd li Rojhilatê Kurdistanê gihandîye roja îro. 

HDK-Îran partîya Pêşewa Qazî Mihemed, , partîya şehîdên nemir Dr.Qasimlo û Dr.Şerefkendî ye û eve 75 sal e bi hişmendî û sîyaseta xwe ya netewî, niştimanî , welatperwerane, wek aktorekî esasî li Rojhilatê Kurdistanê , doza azadîya Kurdistanê dimeşîne, barêkî bi rûmet hildigire.

HDK- Îran di têkoşîna azadîya Kurdistanê de bi hezaran şehîd û bedel daye.Lê tu carî ala azadî û têkoşînê li erdê nexistîye.

Wê Alaya Rengîn a Komara Kurdistanê gava li Mehabadê li ba dida, weke bayê azadîyê tesîra xwe li her sê perçeyên din ên Kurdistanê jî dikir. 

Îro jî ew alaya ku Pêşewa Qazî Mihemed teslîmî Mele Mistefa Barzanîyê nemir kir, bi xebat û têkoşîna pêşmerge, têkoşerên doza azadîya Kurdistanê,  li her çar perçeyên Kurdistanê jî li ba dide. 

Me duhî jî îro jî  têkoşîna xuşk û birayên xwe yên Rojhilatê Kurdistanê her wek têkoşîna xwe dîtîye. Di vê têkoşîna pîroz de, em bi her awayî li gel xuşk û birayên xwe yên Rojhilatê Kurdistanê ne.Û tu şika me jê tuneye ku gelê me li hemû perçeyên Kurdistanê dê azadîya xwe bidest bixe.

Ez di 75emîn salvegera damzrandina HDK-Îranê  de rêberê gelê Kurdistanê Peşewa Qazî Mihemed, şehîdên nemir Dr Qasimlo u Dr Şerefkendî û hemû şehîdên Kurdistanê bi giramî bibîr tînim.

Ez bi  bawerî û  bi hestên xwe yên netewî, niştimanî û  birayane, li ser navê xwe û li ser navê hemû rêvebir û endam û alîgirên PAKê, ji Bakurê Kurdistanê 75emîn salvegera damzrandina HDK-Îranê  pîroz dikim.

Birêz Kak  Mustafa Hîcrî, bi minasebeta 75emîn salvegera damezrandina HDK-Îranê, ez serkeftinê ji cenabê we  re,  ji  hemû pêşmergeyên qehreman re û  ji hemû rêvebir û endam û alîgirên HDK-Îranê re dixwazim.

Li gel rêz û silavên xwe yên birayane

Mustafa Özçelik-Serokê Giştî yê PAKê