کوردستان میدیا

دووشەممه 11ی رەشەمه 2720
ماڵپەڕی ناوەندیی حیزبی دێموکراتی کوردستانی ئێران

ئاوی خواردنەوەی ناوچەی "پەردیس" لە ئەهواز ئاوەڕۆی تێکەڵە

17:43 - 28 بەفرانبار 2720

ئاوی خواردنەوەی ناوچەی "پەردیسـ"ـی ئەهواز ئاوەڕۆی تێکەڵ بووە و ئەمە بووەتە هۆی سەرهەڵدان و زیادکردنی هەندێک نەخۆشی بەهۆی ئاوەڕۆوە.

بەڕێوەبەری گشتیی ژینگەی پارێزگای خووزستان، بە ئاماژە بەوەی کە بەدواداچوون  بوونی زێڕاو لەنێو ئاوی خواردنەوەدا ئەرکی ئیدارەی ژینگە نییە، ڕایگەیاندووە: "بەداوداچوونەکانی ئیدارەی گشتیی پاراستنی ژینگە، هەبوونی ئاوەڕۆی لە ئاوی خواردنەوەی ناوچەی پەردیسی ئەهوازدا پشتڕاست کردووەتەوە".

پێشتر بەڕێوەبەری شیرکەتی ئاو و ئاوەڕۆی پارێزگای خووزستان لە وتووێژێکدا لەگەڵ یەکێک لە هەواڵدەرییەکانی سەر بە ڕێژیمی ئێران ڕایگەیاندبوو، بوونی ئاوەڕۆ لە ئاوی خواردنەوەدا دوورە لە ڕاستی، چون ڕێڕەوی لوولەکەشیی ئاوی خواردنەوە و ئاوەڕۆ لەیەک جیان.

حەوتووی ڕابردوو ئەندامێکی شۆرای شاری ئەهواز، باسی لە تووشبوونی چەندین کەس لە دانیشتووانی ئەو شارە بە "هێپاتیتیA" و نەخۆشیی "ڕیخەڵۆکە" بەهۆی تێکەڵبوونی ئاوەڕۆ لەگەڵ ئاوی خواردنەوە لەو شارەدا کردبوو.

کێشەی ئاوەڕۆی شار لە پارێزگای خووزستاندا کێشەیەکی لەمێژینەیە، بە شێوەی ڕێژەیی لە سەرجەم شارەکانی ئەو پارێزگایەدا بابەتی گواستنەوەی ئاوەڕۆ و لوولەکەشیی پەیوەندیدار بەو کێشەیەوە، قەیرانێکی بنەڕەتییە کە لە سەرجەم وەرزەکاندا و بەتایبەت لە وەرزی زستاندا بەهۆی بارینی باران و سەرڕێژبوونی ئاوەڕۆکان کێشە بۆ خەڵک ساز دەبێت.