لە ڕۆژی شەممە ٢٣ی خەزەڵوەرەوە پێشانگای کتێب لە شاری شوێشە سەر بە ناوچەی کەڵاتەرزانی سنە بە هەوڵی ڕێکخراوی "ژیلەمۆی کتێبی کوردستان" بە ڕووی خەڵکی ناوچەکە، خوێنەران و کتێبدۆستاندا کرایەوە و هەتا ڕۆژی هەینی بەردەوام دەبێت.
ڕۆژی شەممە ٢٣ی خەزەڵوەر، لە شاری شوێشە ڕێوڕەسمی کرانەوەی پێشانگای کتێب بە بەشداریی ڕێژەیەکی زۆر لە خەڵکی ئەو شارە و ئاواییەکانی ناوچەی کەڵاتەرزان بەڕێوە چوو.
ڕێوڕەسمەکە بە سروودی "خوایە وەتەن ئاوا کەی" لەلایەن کۆڕی سروودی منداڵانەوە بە جلوبەرگی ڕازاوەی کوردییەوە دەستی پێکرد.
دواتر کتێبەکان خرایە بەر دیدی خوێنەرانەوە و پێشوازییەکی گەرم لە پێشانگاکە کرا.
لەو ڕێوەسمەدا چەندین چالاکیی دیکەی کەلتووری و فەرهەنگی بەڕێوە چووە.
لەو پێشانگا حەفتەییەدا، منداڵان، لاوان، ژنان و کچان و دەیان کەسایەتیی ئەدەبی، ژینگەپارێز و چالاکانی مەدەنییەوە بەشداریی چالاکانەیان تێدا کردووە.
ئەم چالاکییە فەرهەنگییە، لەلایەن ڕێکخراوی ژیلەمۆی کتێبی کوردستانەوە ڕێک خراوە.