کوردستان میدیا

سێشەممه 13ی جۆزەردان 2720
ماڵپەڕی ناوەندیی حیزبی دێموکراتی کوردستانی ئێران

بردنەسەرەوەی ١٥ لەسەدیی مووچە دەردی کرێکاران دەرمان ناکات

13:14 - 21 خاکەلێوه 2720

لەحاڵێکدا ڕێژیم نەیتوانیوە نرخی هەڵاوسان لەو وڵاتەدا کەم بکاتەوە هەوڵ دەدات بە بردنەسەرەوەی مووچەی کرێکاران پاساو بۆ هەڵاوسانی ٤١ لەسەدی بێنێتەوە.

لە کۆبوونەوەی شۆرای باڵای کاری ڕێژیم، نوێنەرانی ڕێژیم و کارفەرماکان، بە بێ وەرگرتنی ڕای نوێنەرانی کرێکاران، مووچەی کرێکاران بۆ ئەوساڵ ١٥ لەسەد بەرز و پەسەند کراوە و ئەوپەڕی مووچەش ٢١ لەسەد دیاری کراوە.

پەسندکردنی مووچەی ١٥ لە سەدیی کرێکاران لە ئێراندا باری یاسایی نییە.

زیادبوونی نرخی ١٥ لەسەدیی مووچەکان نیوەی نرخی هەڵاوسانیش داناپۆشێت و بەم شێوەیە کرێکاران توانای کڕینیان لەدەست دەدەن.

هاوکات نوێنەری کرێکاران بەهۆی گرینگی نەدانی دەوڵەت بە ڕا و بۆچوونیان، ئامادە بە واژۆکردنی ئەو پەسەندکراوەیە نەبوونه.

لە ساڵانی ڕابردوودا ئەوە یەکەمین جارە کە دانیشتنی شۆرای باڵای کار لەسەر مووچەی کرێکاران، بە بێ وەرگرتنی ڕای گشتی و ڕای نوێنەرانی کرێکاری کۆتایی پێ دێت.

مووچەی کرێکاران هەر ساڵە  دەبێت هاوتەریب لەگەڵ هەڵاوسانی ئابووری زیاد بکرێت تا ئەو چینەی کۆمەڵگا بتوانن بژێوی ژیانیان دابین بکەن و تووشی کێشە نەبن.

دۆخی ئابووریی ڕێژیمی ئێران بەهۆی ئابڵۆقەی سیاسی و گەمارۆوە ئابوورییەکانەوە بە شێوەیەکی بەرچاو داڕماوە و ڕێژیم ئەو گوشارە لەسەر کۆمەڵگا، بەتایبەت کۆمەڵگای کوردستان کە وەکوو هەڕەشەیەک چاوی لێ دەکات دادەنێت.