کوردستان میدیا

پێنجشەممه 18ی سەرماوەز 2721
ماڵپەڕی ناوەندیی حیزبی دێموکراتی کوردستانی ئێران

بنەماڵەی قوربانییانی فڕۆکە ئۆکراینییەکە لە بەردەم دادگای نیزامیی ڕێژیمی ئێران ناڕەزایەتییان دەربڕی

11:23 - 1 سەرماوەز 2721

هاوکات لەگەڵ بەڕێوەچوونی دادگای نیزامی بۆ دە مەئمووری پلە خواری ناسراو لەلایەن ڕێژیمی ئێران وەکوو تاوانبار بە پێکانی فڕۆکەی ئۆکراینی، ڕۆژی یەکشەممە ٣٠ی خەزەڵوەر بە پلاکاردێک کە لە دەستیاندا بوو و لەسەریان نووسرابوو: "خوێندنەوەی دۆسیەی پێش لە بەدواداچوون مافی شیاو و یاسایی ئێمەیە" لە بەرامبەر ڕێکخراوی دادوەریی هێزە چەکدارەکانی ڕێژیمی ئێران ناڕەزایەتییان بەڕێوە برد.

ئەو بنەماڵە ناڕازییانە دروشمی وەکوو "مەرگ بۆ خامنەیی" و "مەرگ بۆ کۆماری ئیسلامیـ"ـیان وتووەتەوە.

"حامید ئیسماعیلیون" وتەبێژی ئەنجومەنی بنەماڵەی قوربانییانی فرۆکەی ٧٥٢ی ئۆکراینی پێشتر بە بڵاوکردنەوەی توییتێک، بەڕێوەچوونی دادگای نیزامیی بە "شەرمەزار" زانی و نووسی: "کورسییەکانی تاوانباران چاوەڕوانی هۆکارە سەرەکییەکان دەمێننەوە. عەلی خامنەیی، فەرماندەکانی سپا و ئەندامانی شورای باڵای ئەمنییەتی ڕێژیمی ئێران بە دوور لە محاکمە نابن".

هەروەها بنەماڵە ناڕازییەکان لە کاتێکدا کە وێنەی قوربانییانیان لەدەستدا بوو، ڕایانگەیاند کە ئەو دادگایە جێگای بڕوا نییە و بێ بنەمایە.

ڕێکەوتی ١٨ی بەفرانباری ١٣٩٨ی هەتاوی، فڕۆکەی بوئینگی ٧٣٧ی هێڵی ئاسمانیی ئۆکراین بە ١٧٦ موسافیرەوە بە هێرشی پەدافەندی ئاسمانیی سپای پاسداران کەوتە خوارەوە و هەموو موسافیرەکانی گیانیان لەدەست دا.