کوردستان میدیا

هەینی 22ی خاکەلێوه 2720
ماڵپەڕی ناوەندیی حیزبی دێموکراتی کوردستانی ئێران

تاکتیک و دژه‌ تاکتیک

11:45 - 23 بەفرانبار 2719

دانه‌یی یه‌که‌م

که‌ریم په‌رویزی

دوای چوار ده‌یه‌ له‌ ده‌سه‌ڵاتداریی سیستمێکی سه‌ره‌ڕۆ، هه‌روه‌ها دوای چوار ده‌یه‌ تاقیکردنه‌وه‌ی زۆر ڕێگا، هه‌روه‌ها دوای چوار ده‌یه‌ خه‌باتی جیاوازی نه‌ته‌وه‌کان له‌ ئێران، ئێستا ئیدی ته‌واوی نه‌ته‌وه‌کانی ئێران، به‌ هه‌موو چین و توێژه‌کانه‌وه‌ و به‌ هه‌موو ئایین و ئایینزاکانه‌وه‌، دژی کۆماری ئیسلامی وه‌ستاونه‌ته‌وه‌.

له‌م چوار ده‌یه‌دا هه‌م تاکتیکی خه‌باتی چه‌کداری و هه‌م تاکتیکی خه‌باتی مه‌ده‌نی و هه‌م تاکتیکی چاکسازیی ده‌روونیی ڕێژیم و زۆر شێوازی دیکه‌ی خه‌بات له‌لایه‌ن خه‌ڵک و نه‌ته‌وه‌کان و گرووپ و چینه‌ جیاوازه‌کانی کۆمه‌ڵگاوه‌ گیراونه‌تە ‌به‌ر.

گه‌ر سه‌رده‌مێک ته‌نیا نه‌ته‌وه‌یەک یان دوو نه‌ته‌وه‌ و به‌شێک له‌ هێزه‌ سیاسییه‌کان دژی ڕێژیمی ویلایه‌تی فەقیهــ بوون، ئێسته‌ ئیدی ته‌واوی کۆمه‌ڵگای ئێران به‌ هه‌موو ڕه‌نگ و ده‌نگ و سیما و ئاوازی جیاوازه‌وه‌ دژی ڕێژیمن.

له‌م سه‌رده‌مه‌دا، ئیدی خه‌ڵک له‌ به‌ره‌یه‌کی شه‌ڕ و ویلایه‌تی فەقیهـ و ده‌زگای سه‌رکوتکه‌ر و داپڵۆسێنه‌ره‌که‌ی له‌ به‌ره‌یه‌کی دیکه‌ن. شه‌ڕێکی قووڵ و قورس له‌ ئارادایه‌. شه‌ڕێکی ڕوون و نه‌پساوه‌ و به‌رده‌وام و هه‌ر دوو لایه‌ن به‌ره‌ به‌ره‌ خۆیان بۆ گه‌یشتن به‌ خاڵی هه‌ره‌ قووڵی به‌ریه‌ککه‌وتنه‌کان ئاماده‌ ده‌که‌ن و نه‌به‌ردی کۆتایی نزیک ده‌بێته‌وه‌.

ئه‌م‌ شه‌ڕه‌ به‌رده‌وامه‌ی نێوان خه‌ڵک و ده‌زگای حاکم، له‌ مه‌یدانی شاردا به‌ڕێوه‌یه‌ و شه‌قام و گۆڕه‌پانه‌کانی شار بوونه‌ته‌ مه‌یدانی شه‌ڕ. ئیدی هه‌ر دوو له‌شکر، له‌شکری خه‌ڵک و سپای داپڵۆسێنه‌ر شه‌ڕ بۆ به‌ده‌سته‌وه‌گرتنی شه‌قام ده‌که‌ن.

له‌م شێوازه‌ شه‌ڕه‌دا ڕێژیمی ئێران ته‌نیا ڕێژیمێک نییه‌ که‌ تاقیی کردووه‌ته‌وه‌ و خه‌ڵکی سه‌رکوت کردووه‌، خه‌ڵکانی ئێرانیش یه‌که‌م خه‌ڵک نین که‌ هه‌وڵ بۆ به‌ده‌سته‌وه‌گرتنی شه‌قام و گۆڕه‌پان ده‌ده‌ن.

ڕێژیمی ئێران له‌ هه‌موو ئه‌زموونی ده‌زگا سه‌رکوتکه‌ره‌کانی وڵاتانی دیکه‌ که‌ڵک وه‌رده‌گرێت و هێزه‌ داپڵۆسێنه‌ره‌کانیان ده‌هێنێته‌ ئێران بۆ ڕاهێنانی هێزی سه‌رکوتکه‌ری ئێرانی، ئامرازه‌کانیشیان لێ ده‌کڕێت و تێکنیکی کوشتار و ئه‌شکه‌نجه‌ی نوێ ده‌کاته‌وه‌.

خه‌ڵکی ئێرانیش پێویسته‌ که‌ له‌ ئه‌زموونی خه‌ڵکی دیکه‌ و وڵاتانی دیکه‌ که‌ڵک وه‌ربگرن و دژکرده‌وه‌یان به‌رامبه‌ر به‌ تاکتیکه‌کانی ڕێژیم هه‌بێت.

له‌ زنجیره‌ چاوپێداخشاندنه‌وه‌یه‌کدا هه‌وڵ ده‌ده‌ین ئه‌و تاکتیکانه‌ی هێزه‌کانی کۆماری ئیسلامی ده‌یگرنه‌ به‌ر باس بکه‌ین و هه‌وڵ بده‌ین که‌ دژه‌ تاکتیکه‌کانی که‌ له‌لایه‌ن خه‌ڵکی وڵاتانی دیکه‌وه‌ گیراونه‌تهبەر‌ وه‌بیر بێنینه‌وه‌. شه‌ڕه‌که‌ له‌ ئارادایه‌ و له‌ به‌رامبه‌ر هه‌ر تاکتیکێکدا ده‌بێ دژه‌ تاکتیکێک هه‌بێت:

تاکتیکی یه‌که‌م:

هه‌موو ناڕه‌زایی و خۆپیشاندانێکی خه‌ڵکی تاکوو خه‌ڵک زۆرتر تێیدا به‌شدار بن، ئیمکانی کۆنترۆڵکردنی دژوارتره‌ و ئه‌گه‌ری به‌هێزتربوونی زۆرتره‌. هێزی کۆکراوه‌ی خه‌ڵک، وه‌کوو ڕنوه‌ به‌فر وایه‌ که‌ هه‌رچی گلۆر ده‌بێته‌وه‌ به‌هێزتر و به‌هێزتر ده‌بێت و هیچ هێزێک ناتوانێت خۆی له‌ به‌رامبه‌ریدا ڕابگرێت. هه‌ر بۆیه‌ سیستمه‌ سه‌رکوتکه‌ره‌کان هه‌وڵ ده‌ده‌ن که‌ هه‌ر له‌ سه‌ره‌تاوه‌ نه‌هێڵن که‌ خه‌ڵک کۆ ببنه‌وه‌.

هێزه‌ دژه‌ گه‌لییه‌کان که‌ به‌ ناوی به‌سیج و هێزی دژه‌ شۆڕش و پاسدار و... له‌ کاتی ئه‌گه‌ری خۆپیشانداندا کۆ ده‌بنه‌وه‌ و شار میلیتاریزه‌ ده‌که‌ن، هه‌وڵ ده‌ده‌ن که‌ ئه‌و خاڵه‌ سه‌ره‌کییانه‌ی شار که‌ ڕابردووی کۆبوونه‌وه‌ی خه‌ڵکیان هه‌یه‌ کۆنترۆڵ بکه‌ن و ڕێگا و شه‌قامه‌ سه‌ره‌کییه‌کان که‌ ده‌چن بۆ ئه‌و شوێنه‌ بگرن و ڕێگای بچووک و جیاواز بۆ گه‌یشتن به‌و شوێنه‌ ده‌هێڵنه‌وه‌.

 مه‌به‌ستیان له‌م کاره‌ دابه‌شکردنی خه‌ڵک و هیدایه‌تی حه‌شیمه‌ت بۆ کۆڵانه‌ لاوه‌کییه‌کان و په‌رته‌وازه‌کردنیان و دوورکردنه‌وه‌یان له‌ خاڵی پێشووه‌ که‌ ئیمکانی خۆپیشاندانی تێدا هه‌بووه‌. به‌م شێوازه‌ هه‌م ده‌یانه‌وێت خه‌ڵک ده‌ستیان به‌و شوێنه‌ی پێشوو نه‌گات که‌ له‌ خۆپیشاندانه‌کانی ڕابردوودا خاڵی لێدانی چه‌خماخه‌ی یه‌که‌م بووه‌. هه‌م خه‌ڵک په‌رته‌وازه‌ بکه‌ن و هێزه‌که‌ی خه‌ڵک وه‌سه‌ر یه‌ک نه‌که‌وێت. هه‌روه‌ها ده‌یانه‌وێت هێزه‌که‌ له‌ کۆڵانه‌ ته‌نگ و ته‌ریککه‌وتووه‌کاندا ون ببن و ئیدی نه‌گه‌ڕێنه‌وه‌ بۆ شوێنی خۆپیشاندانه‌کان.

دژه‌ تاکتیک:

له‌ زۆر وڵات و ده‌کرێت بڵێین له‌ هه‌موو وڵاته‌کاندا ئه‌م تاکتیکه‌ گیراوه‌ته‌ به‌ر و له‌ ڕووسیه‌وه‌ بیگره‌ تاکوو ڤێنێزۆئێلا و تاکوو چین و عێراق و له‌ ده‌یه‌کانی ڕابردووشدا له‌ له‌هێستان و وڵاتانی کۆمۆنیستی، ئه‌م تاکتیکه‌ دژ به‌ خه‌ڵک به‌کار براوه‌.

یه‌کێک له‌ ئه‌زموونه‌ سه‌رکه‌وتووه‌کانی خه‌ڵک بۆ دژی ئه‌م تاکتیکه‌، ئه‌زموونی میسرییه‌کان بوو که‌ دوایه‌ له‌ عێراقیش گیرایه‌ به‌ر.

ده‌سه‌ڵاتی "حوسنی موباره‌ک" هه‌وڵی ده‌دا که‌ خه‌ڵک له‌ کۆڵانه‌ بچووک و لێکدابڕاوه‌کاندا ون بکات، هه‌روه‌ها هێزه‌کانی ده‌وڵه‌تی عێراقیش له‌ مانگه‌کانی پێشوودا ئه‌م کاره‌یان ده‌کرد.

به‌ڵام خه‌ڵکی قاهیره‌ و دوایه‌ش خه‌ڵکی به‌غدا، دژه‌ تاکتیکێکی به‌هێزیان به‌کار برد.

خه‌ڵک خۆیان ته‌نیا به‌ یه‌ک خۆپیشاندانی یه‌ک ڕۆژه‌وه‌ سه‌رقاڵ نه‌کرد و به‌ هێرشێکی هێزه‌ دژیگه‌لییه‌کان، کۆتایی به‌ خۆپیشاندان بێنن؛ به‌ڵکوو به ‌شێوه‌یه‌کی گشتی هه‌موو ڕۆژ هه‌وڵیان دا و هاتنه‌ شه‌قام، به‌ڵام نه‌ک له‌ چه‌ندین شه‌قامی جیاواز، به‌ڵکوو هه‌موو ڕۆژ هه‌وڵیان دا بگه‌نه‌ گۆڕه‌پانی سه‌ره‌کیی شار.

ئه‌وه‌نده‌ دووپاتیان کرده‌وه‌ تاکوو درزیان له‌ ڕیزی هێزه‌ نیزامییه‌کان خست و گه‌یشتنه‌ گۆڕه‌پانی ئازادی. له‌ گۆڕه‌پانی ئازادیی به‌غداش، باڵه‌خانه‌یه‌کی به‌رز هه‌بوو که‌ هێزه‌کان له‌وێوه‌ چاوه‌دێریی خۆپیشاندانیان ده‌کرد. خه‌ڵک ئه‌وه‌نده‌ ڕۆیشتن بۆ ئه‌و باڵه‌خانه‌یه‌ش تاکوو ده‌ستیان به‌سه‌ریدا گرت و له‌ ڕاستیدا سه‌نگه‌ری ئه‌ساسییان له‌ ده‌ستی هێزه‌ سه‌رکوتکه‌ره‌کان ده‌رهێنا.

دژه‌ تاکتیکی یه‌که‌م ده‌بێ ئه‌وه‌ بێت که‌ هه‌موو کات و به‌ به‌رده‌وامی خه‌ڵک هه‌وڵ بده‌ن بگه‌نه‌ گۆڕه‌پانی سه‌ره‌کیی شار، خۆیان له‌ کۆڵان و شه‌قام و گۆڕه‌پانه‌کانی دیکه‌ نه‌ده‌ن و هێزی خۆپیشانده‌ر به‌ره‌و یه‌ک خاڵ و یه‌ک مه‌به‌ست هیدایه‌ت بکرێن. ئیدی به‌ دووپاتبوونه‌وه‌ی ئه‌م تاکتیکه‌، هێزی خه‌ڵک له‌ په‌رته‌وازه‌ بوون و دابه‌شبوون به‌سه‌ر چه‌ند شوێن و دوایه‌ش بڵاوه‌ پێکرانیان ده‌رباز ده‌بێت و یه‌ک ئامانجی ڕوون و دیاریکراو ده‌پێکێت: گرتنی گۆڕه‌پانی ئازادی!