بەپێی هەواڵی گەیشتوو بە ماڵپەڕی کوردستان میدیا، سپای تێرۆریستی پاسداران پێشی بە بەڕێوەچوونی ڕێوڕەسمی سێزدەبەدەر لە گوندی "تەنگیسەر" سەر بە شاری سنە گرت.
ئەمڕۆ شەممە ١٣ی خاکەلێوە بڕیار بوو هاووڵاتییان و دانیشتووانی گوندی تەنگیسەر ڕێوڕەسمی سێزدەبەردەر لەو گوندە بەڕێوە بەرن، بەڵام هێزەکانی سپا پێشان لە بەڕێوچوونی شایی و خۆشیی خەڵکی ئەو گوندە گرت.
سەرچاوەیەکی ئاگادار لەو بارەیەوە ڕایگەیاند: "کاتژمێر ٦، چەندین ماشینی هێزەکانی سپای پاسداران، چوونەتە شوێنی ڕێورەسمەکە و ئیزنی هاتنی خەڵکی گوندی تەنگیسەریان بۆ ئەو شوێنە نەداوە".
ئەو سەرچاوەیە ئەوەشی خستەڕوو: "تەنانەت هێزەکان سپا پێشیان بەو هونەرمەندانە گرت کە بۆ ئەو ڕێوڕسمە بانگهێشت کرابوون".
لەو پەیوەندییەدا ڕۆژی هەینی ١٢ی خاکەلێوە، ئاژانسی کوردپا لە هەواڵێکدا باسی لە بانگهێشتکردنی دێهیار و شورای گوندی تەنگیسەر کردبوو لەلایەن ئیتلاعاتی سپای پاسدارانەوە کە لە ئەگەری بەڕێوەچوونی ڕێورەسمی سێزدەبەردەر خۆیان بەرپرسیار دەبن.
