کوردستان میدیا: ڕێبەری ڕێژیمی ئیسلامیی ئێران لە ڕێوڕەسمی دەرچووانی زانکۆکانی ئەفسەریی ئەرتش، دژکردەوەی خۆی بە خۆپیشاندانەکانی عێراق پیشان دا.
"عەلی خامنەیی"، ڕێبەڕی ڕێژیمی ئێران، ڕۆژی چوارشەممە، ڕێکەوتی ٨ی خەزەڵوەر، لە ڕێوڕەسمی سوێندخواردن و پێدانی سەردۆشی بە خوێندکارانی دەرچووی زانکۆکانی ئەفسەریی ئەرتش، خۆپیشاندانەکانی عێراق و لوبنانی بە ئاژاوە وەسف کرد.
خامنەیی لە قسەکانیدا وتی: "لە جیهاندا زیاتر لە هەموو لایەک ئامریکا و ناوەندە ئیتلاعاتییەکانی ڕۆژئاوا بە پشتیوانیی پارەی وڵاتانی پاشکەوتووی ناوچەکە، شەڕ و ئاژاوە ساز دەکەن".
ڕێبەری ڕێژیمی ئێران وتوویەتی: "ئەوە مەترسیدارترین دوژمنی و ڕق دژی خەڵکی ئێمەیە".
خامنەیی لەو ڕێوڕەسمەدا ئاماژەی بەوە کردووە: "ئەو پیلانانەیان بۆ ئێمەش هەبوو، بەڵام سەرنەکەوت و پووچەڵ بووەوە".
لەو پێوەندییەدا، ڕۆژنامەی "کەیهان" سەر بە خامنەیی بڵاوی کردووەتەوە کە خۆپیشاندەران باڵوێزخانەی ئامریکا لە بەغدا هاوشێوەی ئەوەیکە لە ئێران ڕوویدا، دەستی بەسەردا بگرن.
خەڵکی عێراق و لوبنان ماوەی دوو حەتوو دەبێت کە ڕژاونەتە سەر شەقامەکان و دژی سیستمی سیاسیی ئەو وڵاتانە و هەروەها دەستێوەردانەکانی ڕێژیمی ئێران لە کاروباری ئەو وڵاتانەدا، دروشم دەدەن.
