خۆپیشاندانەکانی خەڵکی عێراق دژ بە هێزە میلیشیاکانی سەر بە ڕێژیمی ئێران و بەرپرسانی وڵاتەکەیان بەردەوامە و تێکهەڵچوونی لێکەوتووەتەوە.
خۆپیشاندانەکانی خەڵکی عێراق لە باشووری ئەو وڵاتە دژ بە بەڕێوبەرانی وڵات و میلیشیا چەکدار و حیزبەکانی سەر بە ڕێژیمی ئێران و خامنەیی بەردەوامە.
ڕێکەوتی ١٦ی خەزەڵوەر دەبێتە نزیک یەک حەوتوو کە خەڵکی عێراق لە شارەکانی "بەسرە" و "نەجەف" خۆپیشاندان بەڕێوە دەبەن.
ئەو خۆپیشاندانانە تێکهەڵچوونی نێوان خەڵکی خۆپیشاندەر و هێزە میلیشیاکانی سەر بە ڕێژیمی ئێرانی لێکەوتووەتەوە.
لەو تێکهەڵچوونانەدا هێزە میلیشیا چەکدارەکانی سەر بە ڕێژیمی ئێران بە چەکی گەرم هێرشیان کردووەتە سەر خۆپیشاندەران و تەقەیان لێ کردوون.
ناڕەزایەتیی سەرەکیی خۆپیشاندەرانی عێراق بەنیسبەت هەبوونی هێزە میلیشیاکانی سەر بە ڕێژیمی ئێران لەو وڵاتەدایە کە خەڵکی وەزاڵە هێناوە و خەڵک خوازیاری چوونەدەرەوەی ئەو هێزانە لە عێراقن.
