پاش کوشتنی بەرپرسێکی ئەتۆمیی ڕێژیمی ئێران، هێزە ئەمنییەتییەکانی ڕێژیمی ئێران گوشارێکی زۆریان خستووەتە سەر خەڵکی شارەکانی کوردستان و خاڵی پشکنین لەسەر ڕێگایان دادەنێن.
هاووڵاتییەک بە ماڵپەڕی "کوردستان میدیا"ی ڕایگەیاندووە کە هێزە ئەمنییەتییەکانی ڕێژیم و بەتایبەت سپای تێرۆریستی پاسداران، لەنێوان ڕێگاوبانەکانی سنە و مەریواندا خاڵی پشکنینیان داناوە.
ئەو هاووڵاتییە هەروەها ڕایگەیاندووە، هێزەکانی ڕێژیم ماشینەکانی خەڵک ڕادەگرن و خۆیان و ماشینەکانیان و تەنانەت مۆبایلەکانیشیان دەپشکنن.
لە ماوەی ڕابردوودا لە چەندین شاری کوردستان هێزەکانی ڕێژیم بەم چەشنە سەرڕێگایان لە خەڵک گرتووە و لە هیچ هەوڵێک بۆ ئازاردان و چاوترساندنی خەڵک دەست ناپارێزن.
هێزەکانی ڕێژیم تاوانی بێدەسەڵاتیی خۆیان دەخەنە ئەستۆی خەڵک و بە ئەمنییەتی کردنەوەی دۆخی شارەکان خەڵک چاوترسێن دەکەن.
