بەڕێوبەری بانکی سپەهی ڕێژیم پاش تاوتوێکردنی دوایین ڕەوتی تێکەڵکردنەوەی بانکەکان ڕایگەیاند کە ٢ بانک لە بانک و دامەزراوە ماڵییەکانی گرێدراو بە هێزە چەکدارەکانەوە تا کۆتایی مانگی بانەمەڕ لەگەڵ بانکی "سپەهـ" تێکەڵ دەکرێنەوە.
پەیوەندییە گشتییەکانی بانکی "سپەهـ" نووسیویەتی: "بەڕێوەبردنی ئەو پلانە ستراتیژیک و نەتەوەییە بە سوودی سیستمی پارە و بەگشتی بە سوودی نیزامی ئابووریی وڵاتە".
ئەمە لە حاڵێکدایە کە سپای تیرۆریستی پاسدارانی ڕێژیمی ئێران لە ڕێگەی بانکی سپەهەوە دەیهەوێت ئاستی دەسەڵاتی خۆی بەسەر ئابووریی ئەو وڵاتە بە ناوی کۆکردنەوە و تێکەڵکردنەوەی بانکە نیزامییەکانەوە بباتە سەرەوە.
سپای تێرۆریستی پاسدارانی ڕێژیمی ئێران نەتەنیا لە بواری بانکەکانەوە بەڵکوو لە ڕێگای جیاوازەوە دەست بەسەر دامەزراوە و شیرکەت و ناوەندەکانی بەرهەمهێناندا دەگرێت و بەو شێوازە زۆربەی ئابووریی ئەو وڵاتە کۆنترۆڵ دەکات.
ئەم کردەوەیەی سپای تێرۆریستی پاسداران یارمەتیدەر دەبێت بۆ پەردەپۆشکردنی گەندەڵییە ماڵییەکانی و هەروەها سپیکردنەوەی پارە و زۆربەی کارە نایاساییەکانی دیکە کە لەژێر دەسەڵاتی بانکی ناوەندیدا ناتوانێت بیکات.
