دەزگای فەرماندەیی هێزی پێشمەرگەی کوردستان سەبارەت بە دەستدرێژییەکانی سپای تێرۆریستی پاسداران بۆ سەر شاخەکانی کوردستان، ڕاگەیەندراوێکی بڵاو کردەوە.
دەقی ڕاگەیەندراوەکە بەم چەشنەیە:
ڕاگەیەندراوی دەزگای فەرماندەیی هێزی پێشمەرگەی کوردستان
ئاگاداری خەڵکی بەشەرەفی کوردستان دەکەین کە ڕێژیمی کۆنەپەرستی کۆماری ئیسلامیی ئێران لە وەرزی بەهاردا لە ڕێکەوتی ٢١ی بانەمەڕی ١٤٠١، ناوچە شاخاوییەکانی ڕۆژهەڵات و باشووری کوردستانی بە چەکی جۆراوجۆری قورس و دڕۆن تۆپباران و مووشەکباران کرد. ئەم کردەوە دژە گەلییەی ڕێژیم لە کاتێکدایە کە خەڵک مەڕوماڵاتی لە هەندەران لە کوێستاندایە و کاسبکاران بۆ بژێویی ژیانی خۆیان دەچنە کوێستان. بەڵام ڕێژیمی دژەگەلی و تێرۆریستی کۆماری ئیسلامیی ئێران وەک هەمیشە دژی ئاسایش و دژایەتیی خەڵکی کوردستان و لە وەرزی بەرەوبوم و ژیانی خەڵک، دەست دەداتە ئەم کردەوە دژە گەلییە و خەسار لە خەڵک و شاخ و گوندەکان دەدات.
بەپێی زانیاریی دەزگای فەرماندەیی، بە خۆشییەوە زیانی گیانی وەبەر کەس و لایەنێک نەکەوتووە، بەڵام زیانی ماددیی لە خەڵک و کوێستان داوە.
ئەم کردەوە دژە گەلییە مەحکووم دەکەین و خەڵکی کوردستان لەم کردەوەیەی سپای تێرۆریستی پاسداران خۆش نابن.
لە چۆنیەتیی دەستدرێژییەکانی ڕێژیم لە داهاتوودا ئاگادارتان دەکەینەوە.
دەزگای فەرماندەیی هێزی پێشمەرگەی کوردستان
٢١ی بانەمەڕی ١٤٠١ی هەتاوی
