یەکێک لە کێشە لەمێژینەکانی شاری سەڵماس نەبوونی بینایەکی تایبەت بە زانکۆی پەیامی نوورە لەو شارەدا بووەتە هۆی کێشە و گرفتێکی زۆر بۆ خوێندکاران.
لە شاری سەڵماس سەر بە پارێزگای ورمێ هەتاکوو ئێستاش زانکۆی پەیام نوور لەو شارەدا بینایەکی تایبەت بە خۆی نییە و بۆ بەڕێوەبردنی پۆلەکان و هەروەها شوێنی مانەوەی خوێندکاران لە بینای زانکۆکانی دیکە یان لە بینا کۆنەکانی پەروەردە و بارهێنان کەڵک وەردەگرن.
ئەمە سەرەڕای ئەوەی کە لە ئاستی خوێندکارێکی زانکۆدا نییە کە بۆ خوێندن ئاوارەی نێو کەلاوەکان بێت، هەڕەشەیەکە بۆ سەر گیان و تەندروستیشیان.
ئەم کێشەیە لەماوەی ساڵانی ڕابردوودا بەردەوام بووەتە هۆی ناڕەزایەتیی خوێندکاران و هەتا ئێستاش ئەو کێشەیە هەروا وەک خۆی ماوەتەوە.
ئەمە لەحاڵێکدایە کە ساڵی ١٣٩٣ زیاتر لە یەک هێکتار زەوین بەخۆڕایی بە بەرپرسانی زانکۆی پەیام نوور لەو شارەدا درابوو و لە هەمان ساڵدا بەرپرسانی زانکۆ هەوڵیان دا بۆ دروستکردنی ئەو زانکۆیە.
ئەو پڕۆژەیە بە پێشبینیی ١ هەزار و ٨٣٠ میتری دووجاوە و لە ٣ نهۆمدا چووە قۆناغی بەڕێوەبردنەوە بەڵام ڕەوتی دروستکردنی ئەو پڕۆژەیە بە دانانی چوارچێوەکە لە ٣ نهۆمدا و بە تێچوویەکی زیاتر لە یەک میلیارد تمەنەوە بەهۆی کەمبوونی بودجە ڕاوەستا.
دواتر لە ساڵی ٩٦دا کاروباری بەڕێوەبردنی ئەو پڕۆژەیە دەستی پێ کردبووەوە و میچی نهۆمی یەکەم و دیوارکەشییەکەی دروست کرا بەڵام لە ئێستادا بۆ تەواوکردنی بینای فێرکاری و ئیدارییەکەی، زیاتر لە ٨ میلیارد تمەن پێویستە تا زانکۆی پەیامی نوور لەو شارەدا ببێتە خاوەن بینا.
