کوردستان میدیا

چوارشەممه 5ی سەرماوەز 2720
ماڵپەڕی ناوەندیی حیزبی دێموکراتی کوردستانی ئێران

سپای تێرۆریستی پاسداران خوازیارە دۆسیەی ناوکی لە دەوڵەتەوە بۆ شورای باڵای تەناهیی نەتەوەیی ڕێژیم ڕابگوێزێت

11:57 - 27 خەزەڵوەر 2720

ئاڵوگۆڕە سیاسییەکانی ئەم دواییانەی ئامریکا سپای تێرۆریستی پاسدارانی هان داوە هەتا دۆسیەی ناوکی لەدەست دەوڵەتی "ڕووحانی" دەربهێنێت و بە شورای باڵای تەناهیی ڕێژیمی بدات.

حەوتوونامەی "سادق" ئۆرگانی ڕاگەیاندنە سیاسییەکانی سپای تێرۆریستی پاسداران بە ئاماژەدان بە ئاڵوگۆڕە سیاسییەکانی ئامریکا، خوازیاری ڕاگواستنی دۆسیەی وزەی ناوکیی ڕێژیمی ئێرانە لە دەستی دەوڵەت و وەزارەتی دەرەوە بۆ شورای باڵای تەناهی.

سپای پاسداران لەو حەوتوونامەیەدا نووسیویەتی: "ڕاگواستنی دۆسیەی وزەی ناوکی بە شورای باڵای تەناهی دەبێ لە ڕوانگەی ئەمنییەتی و بەرژەوەندیی نەتەوەییەوە بێت و ئیزنی دانوستانی مووشەکی و ناوچەیی نەدەینە دانوستانکارانی بەرجام".

هەروەها لەو حەوتوونامەیەدا هاتووە: "دێموکراتەکانی ئامریکا پێیان وایە ئەگەر بیانهەوێت بگەڕێنەوە بۆ ڕێککەوتننامەی بەرجام دەبێ ئێران ئیمتیازی زیاتر و نوێتر بداتە ئامریکا".

سپای تێرۆریستی پاسداران وتوویەتی: "دێموکراتەکان هاوپشکی تاوانی سەرەکیی هاتنەدەری ڕێککەوتننامەی بەرجامن".