کوردستان میدیا: دەزگای ڕێکخستنی گشتیی حیزبی دێموکراتی کوردستانی ئێران، پەیامێکی سەرەخۆشیی بەبۆنەی کۆچی دوایی "دوکتور جەلال حاجی زادە"، کەسایەتیی ئاکادێمیکی سەردەشتی، ڕوو لە خەڵکی ئەو شارە بڵاو کردەوە.
دەقی پەیامەکە بەم چەشنەیە:
خەڵکی نیشتمانپەروەری سەردەشت!
ڕووناکبیرانی خەباتکار و ئۆگرانی زانست و پێشکەوتن!
بنەماڵەی خەمباری مامۆستا جەلال حاجیزادە (ڕامان)!
لەدەستدانی ناوادەی مامۆستای خەباتکار، "دوکتور جەلال حاجی زادە" خەسارێکی گەورە بوو کە وە کۆڕ و کۆمەڵگای تێکۆشەرانی خولیای خزمەت بە گەل و نیشتمانە چەوساوەکەمان کەوتووە.
"دوکتور جەلال حاجی زادە"، کەسایەتییەکی نیشتمانیی ناسراو، خۆشناو و بیرمەندی گەلەکەمان بوو کە فیداکارانە و خۆنەویستانە بەشی هەرە زۆری ژیان و توانای، تەرخانی خزمەت بە گەل و وڵاتەکەی کردبوو و لە بەر هۆکارێکی گوماناوی، لە هەڕەتی گوڕ و توانای خزمەتیدا لەدەستمان چوو.
ئێمە وێڕای بەداخبوونمان لە خەساری لەدەستچوونی مامۆستا "جەلال حاجی زادە"، سەرەخۆشی لە خەڵکی شاری سەردەشت، ڕووناکبیران و تێکۆشەرانی ڕێگای پێگەیاندنی لاوانی نیشتمانەکەمان بەگشتی و بنەماڵەی بەڕێزی دوکتور "جەلال حاجی زادە" دەکەین.
حیزبی دێموکراتی کوردستانی ئێران
دەزگای ڕێکخستنی گشتی
