کوردستان میدیا

پێنجشەممه 6ی پووشپەڕ 2719
ماڵپەڕی ناوەندیی حیزبی دێموکراتی کوردستانی ئێران

لافاو خەساری بە ١٩٨ ئاسەواری مێژوویی گەیاندووە

11:31 - 22 جۆزەردان 2719

کوردستان میدیا: ئیدارەی میراتی فەرهەنگی و گەشتیاریی ڕێژیمی ئێران ڕایگەیاندووە کە لافاو خەساری بە ١٩٨ ئاسەواری مێژوویی گەیاندووە.

"بێهرووز عومرانی"، بەرپرسی لێکۆڵینەوەی میراتی فەرهەنگی و گەشتیاریی ڕێژیمی ئێران ڕایگەیاندووە: "بەپێی ئامارە بەردەستەکان، ١٩٨ میراتی فەرهەنگی، بە هۆی لافاوەوە خەساریان بەرکەوتووە."

ئەم بەرپرسەی ڕێژیم هەروەها وتوویەتی: "لە ئێراندا، دوای بوومەلەرزە، لافاو بەڵڵایەکی گەورەی سروشتییە کە دەبێتە هۆی وێرانکردنی میراتە فەرهەنگییەکان".

ئەم ئامارەی ڕێژیم وەکوو ئامارەکانی دیکەی، جێی باوەڕ نییە و خەسارەکان زۆر زیاتر لەوەن و ڕێژیم لەم بارەشەوە ڕاستییەکان چەواشە دەکات و تەنانەت ڕێژەی قوربانییانی ڕووداوەکە دەشارێتەوە.

ڕێژیمی ئێران جگە لەوەی هیچ بەرنامەیەکی بۆ بەڕێوەبەریی قەیرانەکان و پاراستنی گیانی هاووڵاتییان لە بەڵڵا سروشتییەکان نییە، هیچ پلانێکیشی بۆ پارێزگاری لە ئاسەوارە مێژوویییەکان نییە و خەسار بەم میراتانە دەگەیەنێت.

هەروەها ڕوودانی لافاو لە گوڵستان، شیراز، سەرپێڵ‌زەهاو، ئەزگڵە، خوڕەماوا، سیستان و بەلووچستان، ئیسفەهان و کوهکیلوویە و بویرئەحمەد، جگە لە خەسار بە ئاسەوارە مێژوویییەکان، خەساری گیانی و مادیی گەورەیشی لێ کەوتووەتەوە.

لە بەرامبەردا، بەرپرسانی ڕێژیمی ئێران، لە دۆخە قەیراناوییەکانیشدا دەست لە وتنی خورافه هەڵناگرن و لەو ڕێگایەوە هەوڵی چەواشەکردنی ڕاستییەکان و بەلاڕێبردنی پرس و بابەتەکان دەدەن.