کوردستان میدیا

یەکشەممە 3ی رێبەندان 2721
ماڵپەڕی ناوەندیی حیزبی دێموکراتی کوردستانی ئێران

لە ناوچەی "پردێ" بە مووشەک هێرش کرایە سەر هێزی پێشمەرگە

11:24 - 18 بەفرانبار 2721

"نووری حەمە عەلی" فەرماندەی هێزەکانی پێشمەرگە لە ڕۆژاوای شاری کەرکوک، ئێواری ڕۆژی هەینی ١٧ی بەفرانبار بە تۆڕی میدیایی ڕووداوی ڕاگەیاند: "چەند مووشەک ئاراستەی ناوچەی پردێ لەنێوان کەرکووک و هەولێر کراون، بەڵام زیانی گیانیی نەبووە".

"حەمە عەلی" باسی لەوەش کرد کە ئامانجی ئەو هێرشە مووشەکییانە هێزی پێشمەرگە بووە.

هەروەها وەزارەتی پێشمەرگە لەو پەیوەندییەدا ڕاگەیەندراوێکی دەر کردووە و وتوویەتی: "ئەو مووشەکانە لە ڕۆژهەڵات و باشووری ناوچەی پردێ بە شێوەی هەڕەمەکی هاویشتراون و لە دەرەوەی سەنگەرەکانی پێشمەرگە کەوتوون و هیچ سەنگەرێکی پێشمەرگەیان نەپێکاوە و زیانی گیانی و مادیی نەبووە".

لە ڕابردوودا چەند جار سەنگەرەکانی هێزی پێشمەرگە لەو ناوچەیە کراونەتە ئامانج.

هەتا ئێستا هیچ گرووپێک بەرپرسیاریەتیی ئەو هێرشەی وەئەستۆ نەگرتووە، بەڵام میدیاکان بڵاویان کردووەتەوە کە لانیکەم بە ٨ ڕاکێت ئەو هێرشە ئەنجام دراوە.