بەپێی ڕاگەیەندراوی سەرچاوە ئەمنییەتییەکانی عێراق، لە هێرشی گرووپی تێرۆریستیی داعشدا بۆ سەر بەغدا ١١ کەسی چەکدار و سێڤیل کوژران.
بەپێی ڕاگەیەندراوی سەرچاوە ئەمنییەتییەکان و ڕاپۆرتی "فرانس پرێس"، گرووپی تێرۆریستیی "دەوڵەتی ئیسلامی لە عێراق و شام" ناسراو بە "داعش" هێرشیان کردووەتە سەر بورجێکی دیدەوانی لە ناوچەی "ئەلڕزوانییە" لە ڕۆژئاوای بەغدا.
لەو هێرشەدا ٥ کەس لە میلیشیا چەکدارەکانی حەشدی شەعبی و ٦ کەس لە خەڵکی ناوچەکە کە بۆ بەرپەرچدانەوەی ئەو هێرشە چووبوون؛ کوژران.
ئەو سەرچاوانە ڕایانگەیاندووە کە چەکدارەکانی داعش هێرشیان کردووەتە سەر دیدەوانیی "سەید دەروێش" کە سەر بە ئەرتەشی عێراقە و هێزەکانی "شورای بێداری" لە گوندێک بە ناوی "ئەلخەماس" لە ناوچەی "ئەلڕزوانییە".
گرووپی تێرۆریستیی داعش ماوەیکە هەوڵ دەدات کە گرووپ و دەستەکانی خۆی ڕێک بخاتەوە و ماوە بە ماوە هێرشێک بۆ سەر ئەرتەشی عێراق ئەنجام دەدات.
