لە چەند ڕۆژی ڕابردوودا هەڵمەتێکی دەسبەسەرکردنی مامۆستایان لە شارەکانی کوردستان بەڕێوە چووە و تا ئێستا ژمارەیەکی زۆر مامۆستا لەلایەن هێزەکانی ڕێژیمەوە دەسبەسەر کراون.
تا ئێستا نزیک بە هەژدە مامۆستا لە شاری سەقز دەسبەسەر کراون و لە زینداندا بەرەوڕووی ئازار و ئەشکەنجەی توند بوونەتەوە.
ئەو مامۆستایانە بەسەر چەندین گرووپدا دابەش کراون و بۆ لێپرسینەوە هەندێک بۆ ئیتلاعاتی سپا و کۆمەڵێک بۆ ئیدارەی ئیتلاعات و گرووپێک ڕادەستی هێزی ئینتزامی کراون و دواتر گشتیان بۆ زیندانی ناوەندیی شار ڕاگوێزراون.
ئەو ناوەندانەی ڕێژیم هەڕەشەیان لە مامۆستایان کردووە کە دەبێ هاوکاریی ئەو ناوەندانە بکەن ئەگەرنا لە داهاتوودا چارەنووسی خۆیان و منداڵەکانیان خراپ دەبێت. هەروەها هەڕەشەی دەرکردنی خۆیان و منداڵەکانیان لە قوتابخانەکان کردووە.
ئەو ناوەندانەی ڕێژیم هەروەها تۆمەتی هاوکاری لەگەڵ حیزبەکانی دژبەری ڕێژیمیان لە مامۆستایان داوە و داوایان لێ کردوون کە دەبێ زانیاری لەسەر یەکتری بەو ناوەندانە بدەن.
ئەو مامۆستایانە لە کاتی دەسبەسەرکرانیاندا بەرەوڕووی ئازار و ئەشکەنجە و سووکایەتیی زۆر بوونەتەوە و زۆرێک لە کەلوپەلە کەسییەکانیان وەکوو مۆبایل و لەبتاپ و زۆر کەرەستەی دیکەیان لەلایەن هێزەکانی ڕێژیمەوە گیراون و تا ئێستا پێیان نەدراونەتەوە.
