ناوەندی هاوکاریی حیزبەکانی کوردستانی ئێران لە ڕاگەیەندراوێکدا بڵاویان کردووەتەوە: "لە ڕوانگەی ئێمەوە ئەم جارەش جێگەدەستی ڕەشی تاوانی کۆماری ئیسلامیی ئێران لەم کردەوە تێرۆریستییەشدا ئاشکرایە و هەمووان دەزانن کە کۆماری ئیسلامییە کە بە دنە دان و چەک پێدان و کەڵکوەرگرتن لە گرووپە تێرۆریستییەکانی ناوچەکە، دوژمنی سەرەکیی ئارامی و سەقامگیرییە لە ڕۆژهەڵاتی نێوەڕاست".
دەقی ڕاگەیەندراوەکە بەم چەشنەیە:
ڕاگەیاندراوی ناوەندی هاوکاری بەبۆنەی مووشەکبارانی شاری هەوڵێر
هاونیشتمانییانی بەڕێز!
هەر وەک ئاگادارن شەوی ١٥/٢/٢٠٢١ زایینی، ١٤مووشەک ئاراستەی شاری هەولێر و فڕۆکەخانەكەی كرا و چەند گەڕەکێکی ئەو شارە بوونە ئامانجی ئەم مووشەکانە. بەداخەوە لە ئاکامی ئەم کردەوە تێرۆریستییەدا یەک كەس بوو بە قوربانی و ٨ کەسی دیکەش بریندار بوون. بکەرانی ئەو کردەوە تێرۆریستییە لەلایەن هەر گرووپ و دەوڵەتێکەوە بێت بەتوندی مەحکوومی دەکەین.
هەروەها داوا لە لایەنە پێوەندیدارەکان لە عێراق و هاوپەیمانیی نێودەوڵەتی دژی تێرۆریزم و سەرۆکایەتیی هەرێمی کوردستان دەکەین بە جیدی بەدواداچوون لەم کردەوە تێرۆریستییە بکەن و تێرۆریستان و بکەرانی ئەم کردەوە تێرۆریستییە بە ڕای گشتی بناسێنن و بە سزای خۆیانیان بگەیەنن.
لە ڕوانگەی ئێمەوە ئەم جارەش جێگەدەستی ڕەشی تاوانی کۆماری ئیسلامیی ئێران لەم کردەوە تێرۆریستییەشدا ئاشکرایە و هەمووان دەزانن کە کۆماری ئیسلامییە کە بە دنە دان و چەک پێدان و کەڵک وەرگرتن لە گرووپە تێرۆریستییەکانی ناوچەکە، دوژمنی سەرەکیی ئارامی و سەقامگیرییە لە ڕۆژهەڵاتی نێوەڕاست.
دیارە ئەمە یەکەم جار نییە کە هەرێمی کوردستانی عێراق دەکەوێتە بەر هێرشی تێرۆریستی و دەکرێتە ئامانجی نەیارانی ئەم هەرێمە و جاری کۆتاییش نابێت.
ناوەندی هاوکاریی حیزبەکانی کوردستانی ئێران ئەم کردەوە تێرۆریستییە بەتوندی مەحکووم دەکات و هیوای لەشساغیی دووبارە بو بریندارانی ئەم ڕووداوە دەخوازێت.
ناوەندی هاوکاریی حیزبەکانی کوردستانی ئێران
٢٨ی ڕێبەندانی ١٣٩٩ی هەتاوی
