کوردستان میدیا

یەکشەممە 7ی سەرماوەز 2721
ماڵپەڕی ناوەندیی حیزبی دێموکراتی کوردستانی ئێران

ناڕەزایەتیی هاووڵاتییان بەنیسبەت ڕاگواستنی ئاوی پارێزگای "چوارمەحاڵ و بەختیاری" گەیشتە چوار ڕۆژ

10:15 - 4 سەرماوەز 2721

ڕۆژی چوارشەممە ڕێکەوتی ٣ی سەرماوەز، بەشێک لە هاووڵاتییان لە پارێزگای "چوارمەحاڵ و بەختیاری" بۆ جارێکی دیکە، بەنیسبەت بێ ئاوی و ڕاگواستنی ئاوی ئەو پارێزگایە، لە بەردەم بینای پارێزگاری کۆ بوونەوە؛ ناڕازییان لەو کۆبوونەوەیەدا دژی ڕێژیمی ئێران دروشمیان دا.

ناڕازییان لەو کۆبوونەوەیەدا بە دروشمی "ئێرە چوارمەحاڵە، بردنی ئاو مەحاڵە" و "ڕێژیم بۆ خۆی مافیایە" دژایەتیی خۆیان بەنیسبەت ڕاگواستنی ئاو لەو پاڕێزگایە دەربڕی.

ماوەی چوار ڕۆژە هاووڵاتییان لە چەند شاری پارێزگای "چوارمەحاڵ و بەختیاری" دژ بە گواستنەوەی ئاوی ئەو پارێزگایە بۆ پارێزگاکانی "ئیسفەهان و یەزد" ناڕەزایەتی پێک دێنن.

بەپێی ئاماری فەرمیی ڕێژیم، بەشێکی زۆر لە دانیشتووانی پارێزگای چوارمەحاڵ و بەختیاری بۆ دابینکردنی ئاوی خواردنەوە کێشەیان هەیە و ئاوی ٣٠٠ گوندی ئەو پارێزگایە بە تانکێر دابین دەکرێت.

 ناڕەزایەتی لە پارێزگای "چوارمەحاڵ و بەختیاری" لە ڕۆژی یەکشەممەوە دەستی پێ کردووە و ناڕازییان پێداگرن لەسەر ڕاگرتنی پرۆژەی گواستنەوەی ئاوی ئەو پارێزگایە بۆ پارێزگا ناوەندییەکان.