کوردستان میدیا: گرووپێک لە هونەرمەندانی ئێران لە بەیانییەکدا سەبارەت بە کارەساتی کوشتاری خەڵکی ناڕازی، دژایەتییان دەربڕی. ئەم بەیانییەیە دەڵێت، ناڕازییان وەزاڵەهاتووانێک بوون کە دەنگیان نەبیسترا و ناکارامەییەکانی ڕێژیمییان لەسەر شەقامەکان هاوار کرد.
کۆمەڵێک لە هونەرمەندانی ئێرانی لە بوارەکانی سینەما، موسیقی و شانۆ، لە بەیانییەیەکدا کە ڕۆژی شەممە، ٩ی سەرماوەز بڵاو بووەتەوە، نووسیویانە: "لەم ڕۆژە تاڵانەی کە لە مانگی خەزەڵوەری ٩٨دا تێپەڕی، ساتێک ڕووخساری لاوە گیانبەختکردووەکان، خەڵکانی بریندار، دایکانی داخ لەدڵ و باوکانی بێئۆقرە، لەپێش چاوان دوور ناکرێتەوە".
نووسەرانی ئەم بەیانییەیە دەڵێن: "گەنجانێک کە خوێنی پاکیان ڕژا و سەر بە بێگانەیان لەقەڵەم دان. خەڵکانێک کە ئەمڕۆ لەنێو تەمی بێ هەواڵی و نەبوونی پەیوەندی، ناو و نیشانیان ئاشکرا دەبێت، بە چ گوناحێک کوژراون؟ ئەوان وەزاڵەهاتووانێک بوون کە دەنگیان نەبیسترا و ناکارامەییەکانی ڕێژیمیان لەسەر شەقامەکان هاوار کرد".
لە درێژەی ئەم بەیانییەیەدا کە ڕوو لە ڕێژیمی ئیسلامیی ئێران نووسراوە، هاتووە: "چی لە خەڵک دەکەن؟ چ کەلێنێکتان بۆ بیستنی دەنگی خەڵک ئاوەڵا هێشتووەتەوە؟ کام یەک لە کۆبوونەوەی ناڕزایەتیی خەڵکتان تەحەمول کردووە؟ کام حیزب و تەشکیلاتێکتان کە بتوانێت داخوازیی خەڵک دەرببڕێت، لە ئێرانداهێشتووەتەوە؟ هەر لەسەر ئەم بڕوایەن کە بە توندوتیژی، خەڵک لە سەرەتاییترین مافە مرۆییەکانی بێبەش بکەن؟".
