بەپێی هەواڵی گەیشتوو بە ماڵپەڕی کوردستان میدیا، ڕۆژی هەینی ڕێکەوتی ٢٤ی بانەمەڕ، دەستەیەک لە سەلەفییە جیهادییەکان لە شاری سەقز بە ناوەکانی ''ئەمین ئەحمەدپوور ناسراو بە ئەمین عەبە قلوو، پەیمان غەفاری و ئەرسەلان ڕەزایی'' و کۆمەڵێکی دیکە بە چەقۆ و شمشێر هێرشیان کردووەتە سەر چەند لاوی ئەو شارە و زۆر بەسەختی برینداریان کردوون.
شوناسی ئەو چەند لاوەی کە هێرشیان کراوەتەسەر بەم چەشنەیە: ''هاوڕێ مەلەکی، سەلمان نەقشبەندی، شەهرووز کوهزادی، سالار ئەسلەم و مێهرداد کەریمی''.
''هاوڕێ مەلەکی'' برینەکەی زۆر قووڵە و باری تەندروستیی ناجێگیرە و ئێستاش لە نەخۆشخانەی خوومەینیی شاری سەقز لەژێر چاودێریی پزیشکیدایە.
ئەو سەرچاوەیە ڕایگەیاندووە، نەخۆشخانەی خومەینی لەژێر چاودێریی وردی هێزە ئەمنییەتییەکاندایە و بە بیانووی ڤایرۆسی کۆرۆناوە ئیزن نادەن سەردانی ئەو کەسانە بکرێت.
ئەوە لە حاڵێکدایە دوو حەوتوو لەمەوبەر سەلەفییە جیهادییەکان لە گەڕەکی داسێرانی شاری مەریوان هێرشیان کردبووە سەر خەڵکی مەدەنیی ئەوە شارە و چەند کەسێکیان لێ بریندار کردبوو.
