بە وتەی سەرچاوەکانی ڕێژیمی ئێران، ڕۆژی سێشەممە ٢٣ی سەرماوەزی ١٤٠٠ی هەتاوی، هێزەکانی هەنگی سنووریی ڕێژیمی ئێران لە ناوچەی "هەوارە بەرخەلە" سەر بە شاری "پیرانشار"، گۆزەیەکی پڕ لە سکەی "زیو"یان دۆزیوەتەوە و پاشان ڕادەستی مۆزەخانەی شاری "ورمێـ"ـیان کردووە.
ئەو سکانە لە شێوە جۆراوجۆرەکانی سەردەمی پاشاکان لەوانە: "خوسرەوی دووەم، هۆرمزی پێنجەم، یەزگردی سێهەم و خوسرەوپەرویز" بوون.
بەپێی سەرچاوەکانی ڕێژیم هێزەکانی هەنگی سنووری لەناکاو بەسەر ئەو گۆزە سکەدا کەوتوون، بەڵام سپای پاسداران و هێزەکانی سیستماتیک بەدوای ئاسەوارە مێژووییەکانی کوردستانەوەن بۆ ئەوەی مێژوو و شارەستانییەتی ئەو جوغرافیایە بسڕنەوە و لەلایەکی دیکەوە قازانجی ئابووریی لێ دەبینن.
پێشتریش لە ساڵی ١٣٩٧دا پەرتووکێک لە پەیوەندی لەگەڵ سکەکانی سەردەمی ساسانی لە گوندی "کۆنەلاجانـ"ـی "پیرانشار" دۆزرایەوە، هەروەها ساڵی ١٣٨٥ و لە دوای گەڕان و هەڵکۆڵینی خاکی ئەو گوندەی "پیرانشار"، سپای پاسداران هەزار و ٣٠٠ سکەی "زیو"یـان دۆزییەوە و بە وتەی خۆیان ڕادەستی مۆزەخانەی "ورمێ" کراون.
