کوردستان میدیا

دووشەممه 30ی بەفرانبار 2719
ماڵپەڕی ناوەندیی حیزبی دێموکراتی کوردستانی ئێران

وەرزشوانێکی کورد لە ئاستی جیهاندا سەرکەوتنی بەدەست هێنا

11:22 - 21 سەرماوەز 2719

کوردستان میدیا: وەرزشوانێکی خەڵکی مەهاباد، لە ئاستی جیهان و لە وڵاتی قەزاقستاندا، توانی پلەی سێهەمی کاراتە بۆ خۆی تۆمار بکات.

"بێهزاد خزری" کاراتەکای مەهابادی لە کێبڕکێی جیهانیی ٢٠١٩ی قەزاقستان کە لە ٢٦ وڵاتی جیهانەوە ٢٦٠ وەرزشکار بەشدارییان هەبوو، سەرکەوتنی بەدەست هێنا.

ناوبراو لە کێشی ٧٠ کیلۆدا توانی لە کێبڕکێ لەگەڵ وەرزشکارانی ئینگلیسی، تاجیکستانی و ژاپۆنی سەرکەوتن بەدەست بهێنێت و بگاتە قۆناغی پێش کۆتایی و توانی پلەی سێهەمی جیهان بۆ خۆی مسۆگەر بکات.

ئەو وەرزشوانە کوردە ساڵی ڕابردووش لە کێبڕکێی جیهانیی کاراتەدا توانی میداڵی زیو بەدەست بهێنێت.

"بێهزاد خزری"، تەمەن ٢٩ساڵ، خەڵکی گوێکتەپەی مەهابادە و ١٥ ساڵە لە بواری وەرزشی کاراتەدا کار دەکات و هەتا ئێستا توانیویەتی ٢ جار قارەمانیی جیهان و ٢٠ میداڵی قارەمانی لە ئێراندا بەدەست بهێنێت.

ئەمە لە حاڵێکدایە کە وەرزشوانانی ئێران بەگشتی و وەرزشوانانی کورد بەتایبەتی، لەلایەن ڕێژیمەوە بایەخیان پێ نادرێت و بە ناچار زێدی خۆیان بەجێ دەهێڵن.