سکات بێسێنت، وەزیری خەزێنەداریی ئەمریکا، ڕایگەیاند کە واشنگتۆن درێژە بە گوشارە ئابوورییەکانی دژی کۆماری ئیسلامی دەدات و دۆناڵد ترامپ هیچ ڕێککەوتنێک لەگەڵ تاران بە پێویست نازانێت؛ هۆشداریشی دا کە "خەڵکی ئێران زستانێکی درێژ و ساردیان لەپێشە." بێسێنت لە چاوپێکەوتنێکدا لەگەڵ کاناڵی "سی‌ئێن‌بی‌سی" ئاشکرای کرد کە بەرپرسانی ڕێژیمی ئێران دەرفەتیان هەبوو بۆ ڕێککەوتن، بەڵام ئێستا دۆناڵد ترامپ پێی وا نییە پێویستی بە ڕێککەوتن هەبێت.
ترامپیش لە تۆڕە کۆمەڵایەتییەکاندا جەختی کردەوە کە ئەمریکا دەستی بەسەر سەروەت و سامانی تاران و هەروەها کۆنتڕۆڵی گەرووە ستراتێژییەکاندا گرتووە.
وەزیری خەزێنەداریی ئەمریکا لە بەشێکی تری قسەکانیدا بۆ یەکەمجار دانی بەوەدا نا کە لەلایەن کۆماری ئیسلامییەوە هەڕەشەی لێ کراوە و بەو هۆیەوە بۆ ماوەیەک ماڵەکەی خۆی لە واشنگتۆن بەجێ هێشتووە و بۆ بنکەیەکی سەربازی گواستراوەتەوە.
ڕۆژنامەی "نیویۆرک تایمز"یش پێشتر ڕایگەیاندبوو کە بەهۆی ڕۆڵی بێسێنت لە بەڕێوەبردنی کارزاری گوشاری ئابووری دژی تاران، هەڕەشەکان بۆ سەر ناوبراو و بەرپرسانی دیکەی ئەمریکا وەک نیشانەی سەرکەوتوویی ئەو سیاسەتە هەڵدەسەنگێنرێن.
بێسێنت هەروەها سپای پاسدارانی ڕێژیمی بە "ئاژەڵێکی مەترسیدار کە لە گۆشەیەکدا گیریان خواردووە" شوبهاند و جەختی کردەوە کە سەرەڕای دروستبوونی شۆک لە بازاڕی وزە بەهۆی شەڕەوە، ئەمریکا دۆخەکە بە سەرکەوتوویی تێیدەپەڕێنێت و سیاسەتی پاشەکشەپێکردنی تاران بەردەوام دەبێت.
