کوردستان میدیا

هەینی 22ی خاکەلێوه 2720
ماڵپەڕی ناوەندیی حیزبی دێموکراتی کوردستانی ئێران

وەزیری تەندروستیی ڕێژیم بۆ قەدەغەکردنی هاتوچۆی شارەکان لە سەرکۆمار دەپاڕێتەوە

16:58 - 29 رەشەمه 2719

''سەعید نمەکی''، وەزیری تەندروستیی ڕێژیمی ئێران و ١٧ مامۆستای زانکۆی ئێران، لە نامەیەکدا داوایان لە ''حەسەن ڕووحانی'' سەرکۆماری ڕێژیمی ئێران کردووە کە باشترین ڕێکار، بۆ پێشگرتن لە ڤایرۆسی کۆرۆنا، دابڕاندنی کەسە تەندروستەکانە لە تووشبووان.

"نمەکی" وتوویەتی، بۆ ئەم کارە پێویستە هاتوچۆ و سەفەرکردن بۆ ناوەندە گەورەکانی فرۆشیاری و قەرەباڵغ سنووردار بکرێت و هاتنەژوورەوە و چوونەدەرەوە لە شارەکان کۆنترۆڵ بکرێت.

ئەو مامۆستایانەی زانکۆ و وەزیری تەندروستیی ڕیژیمی ئێران ڕوو لە ''حەسەن ڕووحانی'' وتوویانە، لەبەرچاونەگرتنی ئەم ڕێگەچارانە، گیانی خەڵک دەخاتە مەترسییەکی گەورەوە.

لە سەرەتای هاتنی ڤایرۆسی کۆرۆنا بۆ ئێران، بەرپرسانی ڕێژیم هیچ ڕێکارێکی ئەوتۆیان بۆ پێشگیری لە بڵاوبوونەوەی ئەو ڤایرۆسە نەگرتەبەر.