بۆ کۆچی دوایی کاک "لوقمان مێهفەر" بنەماڵەی شەهیدان لە شارەکانی نۆدشە، نەوسوود، پاوە و گوندەکانی ناوچەی هەورامان پەیامی هاوخەمییان بۆ حیزبی دێموکرات نارد.
دەقی پەیامەکە بەم چەشنەیە:
پەیامی وەفاداری بە ڕێبازی شەهیدان
بۆ حیزبی دێموکراتی کوردستانی ئێران
بەڕێز، بنەماڵەی قارەمانی "مێهفەر"
سڵاو و سەرەخۆشی
بە هەواڵی کۆچی دوایی کاک "لوقمان" پارێزەری نیشتمان، لە سەنگەری حەماسە و تێکۆشانی ئێوەدا، بنەماڵەی شەهیدان لە شارەکانی نۆدشە، نەوسوود، پاوە و گوندەکانی ناوچەی هەورامان، زامەکانیان کولاوە و خەم و ماتەمێکی قووڵ دایگرتن و پەرە پەرەی ژیان و حەماسەت و قارمانەتی شەهیدانمان هاتەوە بیر و پڕ بووینەوە لە غرووری شانازی ڕۆڵەکانمان.
ئازیزان:
وەک چۆن بە شەهیدبوونی هەر یەک لە کوڕانی حەماسەخولقێنمان لە داوێنەکانی شاهۆ، کۆساڵان، کەلـلەقەندی، گەزەن، سۆنی، سەرکۆ، دەربەن، داڵانی، شرام و ئاوەزنێ، نەڕووخاین و نائومیدیمان بەزاند و ئەژنۆمان شل نەکرد، ئاواش بە شەهیدبوونی مامە "لوقمانــ"ـــی پێشمەرگە و کوڕی حەماسەی کێلەشین و پیرانان و وانەبێژی ڕاسانمان، نەک هەر نائومید نابین و ناشڕووخێین، بەڵکو بە ورە و باوەڕێکی پتەوتر لە جاران، هیوادار بە دواڕۆژی ئازادی و سەربەستی دەبین و وەفادار بە ڕێگا و ڕێبازیان دەبین.
لە ناخی دڵمانەوە سەرەخۆشی لە گەلی فیداکارمان و ئێوەی قارەمان دەکەین و دەڵێین دڵمان بە ئێوە خۆشە.
هەزاران هەزار سڵاو بۆ ڕووحی پاکی شەهید لوقمان و سەرجەم شەهیدانی سوورخەڵاتی گەل
بەشێک لە بنەماڵەی شەهیدان
ناوچەی هەورامان
خاکەلێوەی ١٤٠٠
