یەکیەتیی زانایانی ئاینیی کوردستان بەبۆنەی هاتنی جێژنی ڕەمەزان پەیامێکی پیرۆزبایی بڵاو کردەوە.
دەقی پەیامەکە بەم چەشنەیە:
پەیامی پیرۆزبایی بە بۆنەی مانگی ڕەمەزانی پیرۆز
باوەڕداران و ڕۆژوووانانی موسوڵمان و هاونیشتیمانیانی بەڕێز
ئەوا ساڵێکیتر لە تاقیکاریی مانگێکی پڕ لە بەرەکەت و بەخشش و لێبووردەیی گووزەراین و بەخۆڕاگری و ئەرکداری مانگی ڕەمەزانمان تێپەڕ کرد.
ڕەمەزان نۆیەم مانگی ڕۆژمێری کۆچییە، ئەو مانگە لای موسوڵمانان نرخ و ئەرزشێکی بەرزی هەیە و وەک ڕوکنێکی ئەساسی لە ئایینی پیرۆزی ئیسلام دەبینرێت، ڕەمەزان ناوەندی خۆپێگەیاندن و سەربەرزی و خۆشەویستی و دڵسۆزییە، فەلسەفەی ڕۆژووگرتن ڕێگایەکە بەرەو بەدەستهێنانی ڕزامەندیی خودای گەورە و دووربوونەوەیە لە خراپەکاری و خەمخۆری هەژارانە، ڕەمەزان پڕە لە لێبووردەیی و ئاشتەوایی و یەکبوون و یەکگرتنەوە.
سەرکەوتن و ئەنجامدانی ئەم ئەرکە پیرۆزە ڕاکێشانە بەرەو بەختەوەری و ڕزگاری.
یەکیەتیی زانایانی ئایینی کوردستانی ئێران، بەم بۆنەوە پیرۆزبایی دەکات لە سەرجەم باوەڕدارانی جیهان و چووار پارچەی کوردستان و بنەماڵەی شەهیدان و زیندانیانی خۆڕاگری سیاسی و هەموو تێکۆشەرانی بزاڤی ڕزگاریخووازی گەلەکەمان و ئاواتەخووازی بەدیهاتنی سەرجەم مافەڕەواکانمانین.
هەروەها داواکارین لە ڕۆژانی جێژنی ڕەمەزانی پیرۆزدا مناڵانی شەهیدان و زیندانیانی سیاسی و چینی هەژار و بێ دەرەتان لە یاد نەکەن و بە سەردانیکردنیان بەشداریان بکەن لە خۆشی و شادییەکانتان.
هەر ڕۆژێکتان جێژن و جێژنتان پیرۆز بێت.
یەکیەتیی زانایانی ئایینی کوردستانی ئێران
٢٢ی بانەمەڕی ١٤٠٠ی هەتاوی
