یەکیەتیی زانایانی ئایینیی کوردستانی ئێران لە پەیامێکدا بڵاوی کردووەتەوە، حیزبی دێموکرات هەڵقوڵاوی کۆمەڵگای کوردستانە و حیزبی هەموو چین و توێژێکی ئەم نیشتمانەیە و گرینگیی بە داخوازیی گشت دانیشتووانی کوردستان داوە، حیزبێکی نەتەوەیی و بەدیهێنەری بەیداخی یەک بوون و نیشتمانپەروەرییە.
دەقی پەیامەکە بەم چەشنەیە:
بە ناوی پەروەردگاری بێ هاوتا
بەڕێزان ڕێبەرایەتی و کادر و پێشمەرگە قارەمانەکانی حیزبی دێموکراتی کوردستانی ئێران!
بەبۆنەی ٧٦ـەمین ساڵوەگەڕی دامەزراندنی حیزبی دێموکراتی کوردستانی ئێران گەرمترین پیرۆزباییتان لێ دەکەین و ئاواتەخوازین ئامانجەکانی ئەم حیزبە نەتەوەییە بەدی بێت.
حیزبی دێموکراتی کوردستانی ئێران یەکەمین حیزبی مۆدێڕن و خاوەن بەرنامەیەکی تۆکمەی سیاسییە کە توانی خۆی لەگەڵ هەموو پەسندکراوەکانی کۆمەڵگای نێونەتەوەیی ڕێک بخات و داخوازییەکانی گەلی کورد بە شێوەیەکی شارستانییانە هەم بە گوێی دوژمنان و هەمیش کۆمەڵگای جیهان بگەیەنێت، ئەم حیزبە هەڵقوڵاوی کۆمەڵگای کوردستانە و حیزبی هەموو چین و توێژێکی ئەم نیشتمانەیە و گرینگی بە داخوازیی گشت دانیشتووانی کوردستان داوە، حیزبێکی نەتەوەیی و بەدیهێنەری بەیداخی یەک بوون و نیشتمانپەروەرییە.
ئێمە وەک یەکیەتیی زانایانی ئایینیی کوردستانی ئێران وێڕای پیرۆزباییمان، هەردەم پشتیوانی لە حیزبی دێموکرات دووپات دەکەینەوە.
یەکیەتیی زانایانی ئایینیی کوردستانی ئێران
٢٣ی گەلاوێژی ساڵی ١٤٠٠ی هەتاوی
