کوردستان میدیا

سێشەممه 24ی پووشپەڕ 2720
ماڵپەڕی ناوەندیی حیزبی دێموکراتی کوردستانی ئێران

پەیامی ئەندامانی حیزبی دێموکرات لە "نییەر" بەبۆنەی نەوڕۆزی کوردەواری

10:45 - 1 خاکەلێوه 2720

ئەندامان و لاینگرانی حیزبی دێموکراتی کوردستانی ئێران لە گوندی "نییەر" سەر بە ناوچەی ژاوەرۆی سنە بە بۆنەی نەورۆزی کوردەواری پەیامیکیان بڵاو کردەوە.

دەقی پەیامەکە بەم چەشنەیە:

جەژنە جەژنی کوردستانە جەژنی نەورۆزە

بە تیشکی ئاگر ئەنووسم جێژنە پیرۆزە

هاونیشتمانیانی ئازیز!

خەڵکی بەڕێزی کوردستان!

لە مێژووی ژیاری مرۆڤەکاندا، هەر بۆنە و ڕووداوێک هێما و نیشانەی خۆی بە دەستهێناوە کە دواتر بەو هێمایە یادی ئەو ڕووداوەیان کردووەتەوە.

ئێمەی نەتەوەی کوردیش بەپێی مێژوو بە درێژایی ۲۷۲۰ساڵ، یادی ڕووداوێک دەکەینەوە کە چیرۆک و ئەفسانەی زۆر لەسەری وتراون، "نەورۆز" ئەو ناوەیە کە بۆ ئەو ڕۆژە هەڵمانبژاردووە، واتایەکی زۆر ڕوونیشی هەیە؛ ڕۆژێکی نوێ و نوێبوونەوە، شۆڕش و گۆڕانکاری، ڕاسان و ڕاپەڕین و هەستانەوە. هەمووی ئەو ناوانە لە ئەفسانە و چیرۆکەکانی نەورۆزدا خۆیان نیشانداوە. ڕەنگە دیارترین و باوترینی چیرۆکی نەورۆز، سەرکەوتنی شۆڕشی خەڵکێکێ چەوساوە و زوڵم لێکراو بێت دژ بە حاکمێکی خوێنمژ و نادادپەروەر.

بۆ دەربڕینی شایی و خۆشی دوای ئەو سەرکەوتنە مەزنە، "ئاگر" هەڵئەکرێت و بە دەوریدا خۆشی دەکەن و سەمای ئازادی دەگێڕن. "ئاگر" کە گەرماکەی ساردی و سڕی دەتوێنێتەوە و ڕووناکیەکەشی تارمایی لائەبات و ڕاستیەکان دردەکەون ئەبێتە هێمایەک بۆ "نەورۆز"، نەورۆزیش ئەبێتە هێمای شۆڕش و سەرکەوتن، نەورۆزێک کە دوای کڕێوەی ساردی زستان، پەیامی دڵخۆشکەری بەهار و ژیانەوەی پێیە.

هەر وەک ئاگادارن، ساڵانێک "نییەر" جێژوانی ئەویندارانی نەورۆز و مەکۆی هەڵکردنی ئاگرەکەیەتی.

بە داخەوە ئەمساڵ بە هۆی نەخۆشی کۆرۆناوە و بەرچاو گرتنی بەرژەوەندی خەڵک و کۆمەڵگا، بێبەش بووین لە شانازی پێکەوەبوونی نەورۆز، هەر بۆیە هاودەنگ ئەبین لە گەڵ "پارێزەرانی ژیان"ی نیشتمان، جیاواز لە ساڵانی پێشوو لە ماڵەکانی خۆماندا ئاگرە پیرۆزە هەڵئەکەین و نەورۆز بەرز ڕادەگرین.

 پیرۆز بێت نەورۆز 

لە نەتەوەی شۆرشگێڕی کوردستان بە گشتی و

سەرجەم حیزبی دێموکراتی کوردستانی ئێران بە تایبەتی!

هیوادارین چیتر سێبەری ڕەشی زوڵم و جەنایەت لەسەرمان نەمێنێت و خۆرەتاوی ئازادی هەڵبێت و لە پەنای شکۆی چیاکانی زاگرۆسدا نەورۆزی ئازادی بگێڕین!

پۆلێک لە ئەندامان و لایەنگرانی حیزبی دیموکراتی کوردستانی ئێران

نییەر ــ ۱ی نەورۆزی ساڵی ۲۷۲۰ی کوردی