کوردستان میدیا: ئاگرگرتنی دوو کارخانە لە شارەکانی کەرەج و پاکدەشت، شەش کوژراو و دەیان کرێکاری برینداری لێ کەوتەوە.
ڕۆژی دووشەممە ڕێکەوتی ١١ی پووشپەڕ، لە شارەکانی کەرەج و پاکدەشت، بە هۆی ڕووداوی ئاگرگرتنەوە، چەندین کرێکار بوونە قوربانی و دەیان کەسیشیان بریندار بوون.
بەپێی ڕاپۆرتی هەواڵدەریی ئیرنا، بەرپرسی گشتیی ئاگرکوژێنەوەی پاکدەشت ڕایگەیاندووە، کە لەم ڕووداوە ٥ کرێکار، لە کارخانەیەکی کارتۆنسازی لە گوندی مەحموودئاوای پاکدەشت لە ٢٠ کیلۆمێتری شاری تاراندا،گیانیان لە دەست داوە.
هەر لەم پێوەندییەدا لە هەمان ڕۆژدا، لە ئاگرگرتنی کارخانەی "رنگ کمال" لە ڕێگای تایبەتی کەرەج ـ تاران، کەسێک کوژراو و لانیکەم ٣٩ کەسیش بریندار بوون.
هەرچەندە بەرپرسانی پاکدەشت و کەرەج هۆکاری ئەم ئاگرکەوتنەوەیان بە نادیار ڕایگەیاندووە، بەڵام لە تۆڕە کۆمەڵایەتییەکان خەڵک و شایەتحاڵانی ئەم دوو شوێنە، سپای پاسداران و هێزە ئەمنییەتییەکانی ڕێژیم بە هۆکاری ئەم ڕووداوانە دەزانن، چون پێیان وایە داردەستەکانی ڕێژیم بۆ نانبڕینی کرێکارانی ئەو کارخانانە کە لە دەسفرۆشەکانی پێشووی ئەو ناوچەیە پێک هاتبوون، ئەم کارەیان کردووە.
