کوردستان میدیا: چەندین ئەنباری چەکوچۆڵ و مووشەکەکانی حیزبوڵڵای لوبنان، کراونەتە ئامانج و تەقێندراونەتەوە.
بەپێی ڕاپۆرتی هەواڵدەرییەکانی سووریە، شەوی پێنجشەممە، ٣ی جۆزەردانی ١٣٩٧ی هەتاوی، فڕۆکەخانەی زبعە لە نزیک شاری حومس، کراوەتە ئامانج و تەقێندراوەتەوە.
چاوەدێریی مافی مرۆڤی سووریە ڕایگەیاندووە: "بە ئەگەری زۆرەوە ئەو تەقینەوە بە هۆی کرانە ئامانجی ئەنبارەکانی چەکوچۆڵی حیزبوڵڵای لونبان کە لە نزیک فڕۆکەخانەی زبعەدان ڕووی داوە"، هەروەها ئەو ناوەندە مافی مرۆیییە پشتڕاستی کردووتەوە، کە شەوی پێنچشەممە ٦ مووشەک بەرەو فڕۆکەخانەی سەربازیی زبعە و بەشی ڕۆژئاوای پارێزگای حومس هاوێژراون، ئەو ناوچەیە ئەنبارەکانی چەکوچۆڵی حیزبوڵڵای تێدایە، کە بە ئەگەری زۆرەوە لە لایەن فڕۆکە شەڕکەرەکانی ئیسرائیلیەوە کراونەتە ئامانج.
ناوچەی قەسیری حومسی سووریە لە نزیک سنوورەکانی لوبنانە و ناوەندی سەرەکیی بنکە و هێزەکانی حیزبوڵڵای لوبنان و سپای پاسدارانی ئێرانە، کە ئەنبارەکانی چەکوچۆڵ و بنکەکانی ڕاهێنانی سەربازیی تێدایە.
وەزیری بەرگریی ئیسرائیل بە ئاشکرا باسی لەوە کردبوو، کە هەموو بنکەکانی حیزبوڵڵا و سپای پاسدارانیان لە سووریە دەسنیشان کردووە و هەموویان لەنێو دەبەن.
شایانی ئاماژە پێکردنە، کە ئەوە چەندەمین جارە ئیسرائیل بنکەکانی حیزبوڵڵای لوبنان و سپای پاسدارانی ئێران لە خاکی سووریە بۆردمان دەکات.
پێشتریش ئامریکا ڕایگەیاندبوو، کە هەندێ بەڵگەیان بە دەست هێناوە، کە چەکوچۆڵ و مووشەکەکان بە فڕۆکە لە ئێرانەوە بۆ سووریە دەگوازرێنەوە.
هەر لەو پێوەندییەدا، ڕۆژی پێنجشەممە ٣ی جۆزەردان وەزارەتی خەزێنەداریی ئامریکا ٩ کەس و چەندین کومپانیای ئێرانی و تورکیەیی و هەروەها ٣١ فڕۆکەی سەر بە کومپانیا فڕۆکەوانییەکانی ڕێژیمی ئێرانی بە هۆی گواستنەوەی چەکوچۆڵ لە ئێرانەوە بۆ سووریە، خستووەتە خشتەی گەمارۆوەکانی خۆیەوە.
