بەپێی هەواڵی گەیشتوو بە ماڵپەڕی "کوردستان میدیا"، ڕۆژی شەممە ڕێکەوتی ١٦ی سەرماوەز، لە چەند گەڕەکێکی میراوای بۆکان بەتایبەت ئەو گەڕەکانەی دەوروبەری شار، دەستەیەک لە بەسیجییەکانی ڕێژیم بە نێو کۆڵانەکاندا گەڕاون و ویستوویانە بە دابەشکردنی کەلوپەلی خۆراکی خەڵک فریو بدەن و لە ڕێکخراوی بەسیج ناویان بنووسن.
بەپێی زانیارییەکان، ئەم کەسانە هەندێک کەلوپەلی وەکوو "برنج، ڕووب، ماکاڕۆنی" و هێندێک شتی دیکەیان بەو مەرجە بەسەر خەڵکی کەمداهات و هەژار دابەش کردووە کە کۆپیی ناسنامە و وێنەیان لێوەرگرن و لە ڕێکخراوی بەسیجدا ناویان بنووسن.
هەروەها ئەو کەسانەی کە ئەو یارمەتییانەیان لەو بەسیجیانە وەرگرتووە و ناویان نووسراوە پێیان ڕاگەیاندوون کە بۆ ڕۆژی دواتر سەردانی حەوزەی "بەسیج" لە کۆڵانی "سنەوبەر" لە خوارەوەی فەلەکەی فەرمانداری بکەن و کارتەکەیان وەربگرنەوە.
ڕێژیمی ئێران لە ڕێگەی جۆراوجۆر و جیاوازەوە لە هەوڵدایە نەریتی سیخوڕیکردنی ئەندامانی کۆمەڵگا لەسەر یەکتر پەرە پێبدات و بەو جۆرە خەڵک کۆنترۆڵ بکات.
