"سەعید خەتیب زادە" وتەبێژی وەزارەتی دەرەوەی ڕێژیمی ئێران، لە پەیوەندی بە ڕێککەوتننامەی نێوان "عەرەبستانی سعوەدی و کوەیت" سەبارەت بە گۆڕەپانی گازیی "ئارەش-ئەلدەڕە" وتوویەتی: "ئەلدەڕە گۆڕەپانێکی هاوبەشی نێوان ئێران، کوەیت، عەرەبستانە و چەند بەشێکی دیکەشی کە لە لێواری ئاوەکانی نێوان ئێران و کوەیتدایە بە دیارینەکراوی ماونەتەوە".
"خەتیب زادە" باسی لەوە کردووە دەبێ هەر شێوە هەوڵێک بۆ بەرهەمهێنان و گەشە لەو گۆڕەپانە نەوتییەدا بە هاوئاهەنگیی ئێران، کوەیت و عەرەبستان ئەنجام بدرێت.
وتەبێژی وەزارەتی دەرەوەی ڕێژیمی ئێران باسی لەوەش کردووە هەوڵی پێشووی "کوەیت و عەرەبستان" لە چوارچێوەی بەڵگەیەکی هاوکاریدا، لەگەڵ چاوپێکەوتن و دانیشتنەکانی کە پێشتر ئەنجاممان داون نایاسایین و ناتەباییان هەیە.
ناوبراو هەروەها وتوویەتی: "ئێران مافی خۆی بۆ بەرهەمهێنان لە گۆڕەپانی هاوبەشی گازیی ئارەشدا دەپارێزێت".
